Уһук Илин уонна Арктика демографиятын сайдыытыгар аналлаах кэмпириэнсийэ саҕаланна

Дьокуускайга бүгүн, бэс ыйын 23 күнүгэр, бүтүн Арассыыйатааҕы Уһук Илин уонна Арктика демографиятын сайдыытын боппуруостарыгар аналлаах VII кэмпириэнсийэ саҕаланна.
Нэһилиэнньэ ахсаанын элбэтиини дойду бэрэсэдьиэнэ Владимир Путин биир сүрүн соругунан туруорбута.
— Кэмпириэнсийэ бырагырааматыгар киирбит боппуруостар дойду сайдыытыгар сылтан сыл ахсын сүрүн суолтаны ылаллар. Ол курдук былаас уорганнарын, эспиэрдэр, учуонайдар, уопсастыбаннай диэйэтэллэр болҕомтолорун тардар, — диэн СӨ бырабыыталыстыбатын бэрэссэдээтэлин солбуйааччы Ольга Балабкина бэлиэтээтэ.
Кини бу тэрээһини Саха АССР 100 сылыгар уонна өрөспүүбүлүкэҕэ биллэриллибит Ийэ сылыгар cөп түбэһиннэрэн тэрийэр ордук тоҕоостооҕун эттэ. Өрөспүүбүлүкэ үбүлүөйүнэн Саха сиригэр 100 социальнай эбийиэк —уһуйааннар, оскуолалар, култуура дьиэлэрэ, балыыһалар, успуорт комплекстара тутуллубуттарын ыйда. Маны сэргэ кини:
— Өрөспүүбүлүкэбит аҕа баһылыга Айсен Николаев бу сылы Ийэ сылынан биллэрбитэ. Үбүлүөйдээх сылга төрөөбүт хас биирдии оҕо өрөспүүбүлүкэттэн “100 cыл оҕолоро» диэн бырагыраамманан сүүс тыһыынчалаах тус сыаллаах хапытаалга тиксэллэр. Ил Дархан анал этиитигэр оҕону иитэр дьиэ кэргэттэр эмиэ умнууга хаалбатахтара. Ол курдук ааспыт нэдиэлэҕэ кини оҕолору иитэр дьиэ кэргэҥҥэ төлөбүрү улаатыннарыы туһунан өрөспүүбүлүкэ иһинээҕи сокуон олохтоммута, — диэн санаатын үллэһиннэ Ольга Валерьевна. Кини бэлиэтээбитинэн, Саха сирэ оҕо төрөөһүнүгэр Уһук Илиҥҥэ бастакы миэстэҕэ, оттон бүтүн Арассыйыыйа үрдүнэн сэттис миэстэҕэ сылдьар. Тыйыс айылҕалаах, тымныы килиимэттээх дойдуга сайдыыга дьулуһуу аан дойду үрдүнэн үгүс хотугу уонна арктическай эрэгийиэннэргэ холобур эрэ буолар кыахтаах диэтэ.

Кэмпириэнсийэ модератора, научнай-уопсастыбаннай эспэртиисэ институтун генеральнай дириэктэрэ, РФ уопсастыбаннай палаататын демография боппуруоһугар, дьиэ кэргэн көмүскэлин, үтүө үгэстэрин, хамыыһыйатын бэрэссэдээтэлэ Сергей Рыбальченко бэлиэтииринэн, кэмпириэнсийэҕэ эрэгийиэннэр бастыҥ үлэлэрин быраактыкатын билсиэхтэрэ:
— Уһук Илин бастыҥ демографическай көрдөрүүлээх. Сахалин уобалаһыгар оҕо төрөөһүнүн бырыһыана үрдээбит үтүө уопутун билэбит. Ону сэргэ, Саха сиригэр эмиэ бу бырыһыан үрдээбитин көрөбүт. Саха сирэ нэһилиэнньэтин ахсаанын биир мөлүйүөҥҥэ тиэрдиэн баҕалааҕын эмиэ билэбит уонна итэҕэйэбит, хаһан эрэ ити сыыппараны ситиэххит. Кэмпириэнсийэҕэ саҥа өйөбүл миэрэлэрин, демография боппуруоһун кэпсэтиэхпит.
Модератор дааннайынан, РФ 15 субъегыттан 400 киһи сирэй кыттыыны ылыаҕа, онтон тыһыынчаттан тахса киһи онлайн-эрэсиим нөҥүө кыттыаҕа.

Ульяна ЗАХАРОВА.

Хаартыска интэриниэттэн