РФ бэрэсидьиэнин быһа эфирыгар Уһук Илин регионнарга салгын тырааныспарынан көтүү тарыыба ыараханын эттилэр. Бу боппуруоска Владимир Путин маннык хоруйдаата.
edersaas.ru
“Билигин нэһилиэнньэ анал бырагырааманан чэпчэтиилээх билиэтинэн көтөр. Ити субсидиялаах билиэккэ киһи эрэ барыта тиксибэт. Манна сааһынан хааччахтаах уонна ахсаана аҕыйах. Итини быһаарыыга билигин хас да миэрэни ылыныахпытын наада. Бастакытынан, географиятын кэҥэтиэххэ наада. Билигин манна үлэлэһэ сылдьабыт. Иккиһинэн, субсидиялаах билиэтинэн туһаныы кэмин уһатыахха, үсүһүнэн, туһанар киһи сааһын көрүөххэ наада. Бу боппуруоска аҕыйах хонуктааҕыта быһаарыныы ылан олоробут: Уһук Илин эрэгийиэннэргэ көтүүгэ нолуок диэн суох буолла. Билиэт сыанатыгар ити хайдах дьайарын көрөн иһиэхпит”, — диэн иһитиннэрдэ бэрэсидьиэн.
Санатан эттэххэ, Владимир Путин Анал этиитигэр эрэгийиэннэр икки ардыларыгар көтүүлэри саҥалыы тэрийиэхпит, сыана кыччыаҕа диэн бэлиэтээн турар.
Аграфена КУЗЬМИНА, “Саха сирэ” хаһыат, edersaas.ru.