Быыбар ааспытын, бириэмэ бара түспүтүн кэннэ, санаабын сааһыланным.
Россия үрдүнэн Владимир Путин 76,6 бырыһыаны ылан кыайда. Быыбары барытын көрө барбакка, биһиги федеральнай уокурукпут — Уһук Илин Путиҥҥа хайдах куоластаабытын тула санаабын үллэстиим.
Туох да кистэл суох, билигин бу 9 эрэгийиэн сүрүн экэнэмиичэскэй боппуруостара, үбүлэнэр бырагыраамалара барыта федеральнай уокурук нөҥүө быһаарыллар. Дойду орто көрдөрүүтүттэн, Юрий Трутнев салайааччылаах Уһук Илин уопсай көрдөрүүтэ арыый кыра буолан таҕыста. Ону бары көрөн олоробут. Федеральнай уокурукка 9 эрэгийиэн баар. Уһук Илин тоҕус эрэгийиэниттэн иккитэ эрэ (Чукотка уонна Магадан) 70 бырыһыаны куоһарда. Уоннааҕылар – сэттэ эрэгийиэн – Приморскай кыраай, Хабаровскай кыраай, Еврей автономнай уокуруга, Саха сирэ, Сахалин уобалаһа, Амурскай уобалас – бары 60-70 бырыһыан икки ардынан куоластаатылар.
Биир хандьыдаат аҕыс киһиттэн 60-тан тахса куолаһы ылыытын, дьиҥэр, кылбар кыайыы быһыытынан холкутук сыаналыахха сөп. Оннооҕор, икки хандьыдаат киирсибититтэн тэбис-тэҥ (50-50) куолаһы ылан баран, биирэ докумуонун урут туттарбытынан, сокуоннай баһылык буолбутун бэркэ өйдүүбүт. Ити иллэрээ сыл Булуҥ улууһугар Игорь Кудряшов Аркадий Алексеевы кыайбытын кэпсиибин.
Путин Уһук Илиҥҥэ бырыһыана — киһи сирбэт бырыһыана. Уопсай көрдөрүүгэ холоотоххо эрэ кыра курдук.
Федеральнай уокурук тоҕо Россия уопсай көрдөрүүтүттэн кыра куолаһы биэрдэ? Бу тоҕотун туһунан билигин политтехнологтар төбөлөрүн сынньаллар. Ону социальнай ситимнэртэн ааҕа-билэ олоробут.
Мин санаабар, Уһук Илин биир тэҥник куоластааһына — бу тоҕус эрэгийиэн дьоно кэлиҥҥи кэмҥэ биир бэлитиичэскэй хамаанда быһыытынан сананар өйгө-санааҕа тиийэн эрэрбитин көрдөрбүтэ саарбаҕа суох. Бу быыбар тоҕус эрэгийиэн бары биир балаһыанньалаах, биир кыһалҕалаах олорорун илэ көрдөрдө.
Эрэгийиэннэрин түмүүгэ Трутнев бу сыллар усталарыгар улахан үлэни ыыппытын билинэбит. Хапытааммыт билигин бу түмүллүбүт хамаанданы салгыы көдьүүстээхтик салайан, аны үрдүк экэнэмиичэскэй көрдөрүүгэ тиэрдэрэ хаалла. Кэлэр түһүмэх соруга — ол.
Прокопий БУБЯКИН,
«Саха сирэ» хаһыат, Еdersaas.ru сайт сүрүн эрэдээктэрэ.