Сэтинньи 22 күнүгэр Москва куоракка Уһук Bлин эрэгийиэннэр күннэринэн квест саҕаланна уонна «Метро-Экспо» быыстапка аһылынна. Манна сүрүн бириистэринэн дойдубут киэҥ киэлитинэн умсугутуулаах айан аҕыс путевка оонньонор.
Куонкуруска кыттыан баҕалаахтар ахсынньы 4 күнүгэр диэри регистрацияланыахтарын сөп. Бастакы тыһыынча кыттааччы номнуо сорудахтарын толорон саҕалаабыт. Бастакы түһүмэххэ кыттааччылар квест ыытыллыытын туһунан социальнай ситимнэргэ тарҕатыахтаахтар уонна оонньуу сорудахтарын толоруохтаахтар. Иккис түһүмэх ахсынньы 5-8 күннэригэр буолуоҕа. Манна 24 кыттааччы хаалан, айар сорудахтарын оҥорон, онно элбэх «лайк» хомуйуохтаах. Кыайыылаахтары быһаарыы ахсынньы 9-10 күннэригэр буолуоҕа. Аҕыс эрэгийиэн аҕыс бирииһэ кыттааччылары күүтэр.
Онтон биир сүрүн бирииһинэн Саха сирин маанылаах кэрэ айылҕатыгар күүлэйдиир путевка буолар. «Дьиктилээх Саха сирэ» тур Дьокуускайтан саҕаланыаҕа. Манна экскурсия бырагыраамата олус киэҥ. Ону таһынан ирбэт тоҥ муустаах Булууска, кэрэ айылҕалаах Өлүөнэ очуостарыгар сылдьыахтара. Саха норуотун төрүт аһын амсайыахтара уонна биһиги төрүт култуурабытын кытта билсиэхтэрэ.
Маны сэргэ бу тэрээһин чэрчитинэн Москва куорат метрополитенын Выстовочная ыстаансыйатыгар «Метро-Экспо» диэн аһаҕас быыстапка буолуоҕа. Манна Сахабыт сирин интерактивнай тач-панеллээх истиэндэтэ туруоҕа.