Уһук Илин ипотекатын 40-гар диэри саастаах дьон ылалларын СӨ бырабыыталыстыбата туруорсар. Этиини РФ тутуу министиэристибэтигэр ыыттылар. Бу туһунан СӨ тутууга миниистирин бастакы солбуйааччы Галина Новикова иһитиннэрдэ.
Билигин чэпчэтиилээх Уһук Илин ипотекатын 35-гэр диэри саастаах эдэр ыаллар, аҥаардас төрөппүттэр уонна “Уһук Илин гектаар” бырагыраама кыттааччылара, ону тэҥэ, эрэгийиэннээҕи бырагырааманан Уһук Илиҥҥэ үлэлии, көһөн кэлбит дьон ылар кыахтаахтар. Билиҥҥи уустук балаһыанньаҕа, маннык чэпчэтиилээх усулуобуйаны кэҥэттэххэ, ипотеканы ылар дьон ахсаана эбиллиэ этэ. Ону тэҥэ, кириисис усулуобуйатыгар дьиэни тутааччыларга эмиэ табыгастаах.
Ону тэҥэ, кирэдьиит кээмэйин 9 мөлүйүөн солкуобайга диэри улаатыннарар туһунан этии киллэрбиттэр.
Уһук Илин ипотекатын бырагыраамата 2019 сылтан үлэлии турар. Кыра бырыһыаннаах буолан, ипотеканы ылар дьоҥҥо уонна тутааччыларга барыстаах. Былырыыҥҥыттан ыла чэпчэтиилээх ипотека бырагырааматыгар Уһук Илин эрэгийиэннэрин улахан куораттарыгар иккис ырыынакка (вторичное жилье) кыбартыыраны атыылаһар кыаҕы биэрбиттэрэ.
Ангелина Васильева, “Саха сирэ” хаһыат, edersaas.ru