Уһук Илин эрэгийиэннэригэр куораттары тупсарыы боппуруостарын ырытыахтара

Сарсын, бэс ыйын 10 күнүгэр, Владивостокка Уһук Илиҥҥи  Медиасаммит былаһааккатыгар «ProДФО» пуорум пленарнай мунньаҕа ыытыллыаҕа. Онно «Дьон олорор куората: Уһук Илиҥҥи уокурук куораттарыгар сайдыы кэскиллээх тосхоло» диэн тиэмэни дьүүллэһии, ырытыы буолуоҕа.

Манна куорат олохтоохторо сынньанар, үлэлиир эйгэлэрин тула кэпсэтиэхтэрэ, сонун сүүрээннэри тобулуохтара, экэниэмикэ сайдар саҕахтарын дьүүллэһиэхтэрэ. Ол курдук, Приморскай кыраай губернатора Олег Кожемяко: «Куорат олохтооҕо киниэхэ туох наадатын ыйан туран, бэйэтинэн уулуссатын, тиэргэнин тупсарыыга кыттыһарын өйдөөн туран, олохтоохтору бэйэлэрин кытыннарабыт уонна үбүлээһини кинилэр өйөөбүт эбийиэктэригэр туһанабыт. Бу холобурдары мин пуорумҥа уопут атастаһыытын быһыытынан кэпсиэм«, — диэн санаатын үллэһиннэ.
Тэрийээччилэр быйылгы пуоруму эппиэттээх дьон дакылааттыылларын курдук буолбакка, санаа уонна үлэ уопутун атастаһыытын курдук былааннаабыттарын суруналыыстар сэргээтилэр уонна тэрээһин интэриэһи тардарыгар эрэллээхтэр.

Пуорум пленарнай мунньаҕа Уһук Илиҥҥи федеральнай университет конгреһы ыытар быыстапкалыыр киинигэр буолуоҕа. Тэрээһин туһунан Уһук Илиҥҥээҕи иһитиннэрэр биллэрэр: ИА «Сhitamedia», https://chitamedia.su/, ИА «Priamurmedia.ru», https://priamurmedia.ru/, ИА «Ussurmedia.ru», https://ussurmedia.ru/, ИА «Primamedia.ru», https://primamedia.ru/сонуннары тарҕатар ааҕыныстыбаларыттан билсиэххэ сөп.

Елена ПОТОЦКАЯ, «Саха сирэ» хаһыат, edersaas.ru