Бу күннэргэ РФ Бэрэсидьиэнэ Владимир Путин «Уһук Илин социальнай-экономическай сайдыытыгар миэрэлэр тустарынан» Ыйааҕа таҕыста.
edersaas.ru
СӨ Дьахталлар уопсастыбаннай тэрилтэлэрин сойууһун бэрэссэдээтэлэ Анжелика Андреева бу суолталаах докумуон туһунан санаатын эттэ:
— Биһиги, Уһук Илин уокурук дьахталларын уопсастыбаннай сойуустарын салайааччылара, олус түмсүүлээхтик үлэлиибит. Бэйэбит батсаап бөлөхтөөхпүт . Манна эригийиэннэрбитигэр буола турар сонуннары үллэстэбит. Араас суолталаах боппуруостары быһаарсабыт, сүбэлэһэбит. Онон РФ Бэрэсидьиэнэ Владимир Путин таһаарбыт ыйааҕа үлэбитигэр тирэҕинэн буолуоҕа. Дойду Аҕа баһылыга кытыы сытар нэһилиэнньэлээх пууннарга болҕомтону туһаайарга этиитин сэргии ылынныбыт. Биллэн турар, маннык сирдэргэ тирээн турар боппуруоһунан мэдиссиинэ, үөрэхтээһин уонна физкултуурунай-спортивнай тэрилтэлэрин каадырдарынан хааччыйыы, кинилэр үлэлииллэригэр сөптөөх усулуобуйаны тэрийии, биир кэмнээх компенсация төлөбүрүн оҥоруу боппуруостара — сүрүн ирдэбиллэр.
Хаарбах туруктаах олорор дьиэ ахсаанын 2024 сылга диэри кыччатыыга миэрэлэри ылыы — эмиэ улахан өйөбүл.
Онон биһиги, Уһук Илин уокуругун уопсастыбанньык дьахталлара, бу суолтаах ыйааҕы биһирии ылынныбыт.
Елена ПОТОЦКАЯ, «Саха сирэ» хаһыат , edersaas.ru