Владивосток куоракка бу күннэргэ «Уһук Илини уонна Арктиканы демографическай сайыннарыы » диэн бүтүн Арассыыйатааҕы кэмпириэнсийэ чэрчитинэн, «Среда для жизни как миграционный фактор» диэн тиэмэҕэ панельнай сиэссийэ буолла.
Эспиэртэр олох эйгэтин сүрүн сайдыытынан тупсаҕай уонна хаачыстыбаалаах дьиэ-уот эрэ буолбакка, аныгы уопсастыбаннай эйгэ, бары өттүнэн сөпкө аттарыллыбыт уулуссалар уонна уопсастыбаннай тырааныспар улахан оруоллаахтарын ыйдылар.
Уһук Илини уонна Арктиканы сайыннарыыга корпорация анал ыйытык тэрийбитигэр, олохтоохтор куораттарыгар сүрүннээн социальнай уонна култуурунай эбийиэктэр элбэх буолуохтаахтарын туһунан этиммиттэр. Сиэссийэҕэ чуолаан Уһук Илиҥҥи уокурукка нэһилиэнньэ олороругар ханнык-туох миэрэлэр ылыллыахтаахтарын, олох-дьаһах усулуобуйатын тупсарыы боппуруостарын тула кэпсэтии буолла. Манна даҕатан этэр буоллахха, Саха сиригэр биир сүрүн хайысханан куорат эйгэтин тупсарыыга болҕомто ууруллар. Ол быһыытынан сыл аайы Саха сирин куораттарыгар, нэһилиэктэригэр саҥа пааркалар, искибиэрдэр, анал былаһааккалар тутуллаллар. 2019 сылтан Саха сиригэр 30 уопсастыбаннай эйгэ уонна 104 тэлгэһэ тупсарыллан оҥоһуллубут. Быйыл 18 саҥа уопсастыбаннай эйгэ уонна 124 тэлгэһэ баар буолара ситиһиллибит.
Уһук Илини уонна Арктиканы сайыннарыыга корпорация генеральнай дириэктэрин социальнай сайдыыга 1-кы солбуйааччы Эльвира Нургалиева РФ Илини сайыннарыыга министиэристибэтэ уонна тустаах корпорация Уһук Илиҥҥи уокурукка уонна Арктикаҕа нэһилиэнньэ болҕомтотун уурарыгар биир тиһиктээх үлэни ыыталларын уонна тустаах эрэгийиэннэргэ дьон-сэргэ олохсуйарыгар сөптөөх усулуобуйа тэриллэрин туһунан иһитиннэрдэ.
«Олох эйгэтэ диэн киһи бары өттүнэн олороругар аналлаах тупсаҕай сир-уот буолар. Онно бары өттүнэн сөпкө аттарыллан тутуллубут дьиэ-уот, аныгылыы оҥоһуулаах тэлгэһэлэр, былаһааккалар киирэллэр. РФ Бэрэсидьиэнэ Владимир Путин сорудаҕынан Уһук Илиҥҥи уокурукка 25 куораты сайыннарыыга стратегическай докумуону оҥоруу саҕаламмыта. РФ Илини сайыннарыыга министиэристибэтин «1000 тэлгэһэ» диэн бырагырааматын көмөтүнэн сүүһүнэн ааҕыллар тэлгэһэ тупсарыллан оҥоһулунна. Ону тэҥэ, РФ Илини сайыннарыыга министиэристибэтэ биһиги корпорациябытын кытта «Дальневосточнай кыбаартал» диэн бырагырааманы үлэлэтэн, Уһук Илини сайыннарыыга саҥа формат олоххо киирэн эрэрэ махталлаах дьыала. Онон бары өттүнэн сөптөөх хайысханы тутуһан үлэлээн иһэбит. Уһук Илиҥҥи уокурук нэһилиэнньэтин олоҕо-дьаһаҕа тупсарыгар аналлаах үлэ салгыы ыытыллыаҕа», — диэн Эльвира Нургалиева санаатын үллэһиннэ.