Уһук Илиҥҥи үс үрдүк үөрэх кыһатыгар казачествоҕа каадырдары бэлэмниэхтэрэ
Улан Удэ куоракка (Бурятия) тыа хаһаайыстыбатын академията, Забайкальетааҕы аграрнай институт — А.А.Ежевскай аатынан Иркутскайдааҕы судаарыстыбаннай аграрнай университет филиала уонна Хабаровскай куорат Тихоокеанскай судаарыстыбаннай университет үрдүк үөрэх тэрилтэлэрин ассоциациятыгар каадырдары бэлэмнээһини олоххо киллэриэхтэрэ.
Ассоциацияны тэрийэр туһунан быһаарыы 2021 с ыам ыйын 28 күнүгэр РФ Бэрэсидьиэнин иһинэн казачество дьыалаларыгар сэбиэтэ научнай- чинчийэр үлэни ыыппыт бастайааннай хамыыһыйатын мунньаҕар РФ наукаҕа уонна үрдүкү үөрэхтээһиҥҥэ миниистирэ Валерий Фальков салайыытынан ыытыллыбыта. Ассоциацияҕа барыта 14 Арассыыйа үрдүк үөрэҕин тэрилтэтэ, олортон 3- һэ Уһук Илиҥҥи федеральнай уокурукка киирэллэр.
Ыччаты кытары, каадыр резервэтин бэлэмнээһин үлэтигэр, көлүөнэлэр утумнаах буолууларын хааччыйыыга туһуламмыт үлэ суолтатын РФ Бэрэсидьиэнин көмөлөһөөччүтэ, РФ Бэрэсидьиэнин иһинэн казачество дьыалаларыгар сэбиэтин бэрэссэдээтэлэ Анатолий Серышев хаста да бэлиэтээн турар. Кини этэринэн, каадырдары квалификациялааһын казактар уопсастыбаларын көдьүүһүттэн уонна олох- дьаһах көдьүүстээхтик сайдыытыттан тутулуктаах.
Хамыыһыйа мунньаҕар Арассыыйа казачествотын устуоруйатын үөрэх тэрилтэлэригэр үөрэтии биир кэлим концепциятын бырайыагын дьүүллэстилэр.
Бүтүн Арассыыйатааҕы казактар уопсастыбаларын атамаана, казактар генераллара Николай Долуда аныгы казачество кыаҕыгар эрэнэрин биллэрдэ. Атамаан этэринэн, судаарыстыбаннай толкуйу иитиигэ уонна өйөөһүҥҥэ быыстала суох казак үөрэҕириитин тиһигэ наада. «Казачество тыынын оҕоҕо кыра эрдэҕиттэн, уһуйаантан саҕалаан, онтон 11 сыл оскуолаҕа өбүгэлэрбит устуоруйаларын, култуураларын уонна олохторун-дьаһахтарын үөрэтиэххэ наада, Онтон устудьуоннуур саастарыгар казактааҕы бэйэни салайыныыны тэрийиэххэ», – диэн Николай Долуда бэлиэтээтэ.
Инникитин казачество устуоруйатын үөрэтии секторын Арассыыйа наукатын академиятын институтугар тэрийии, номнуо тахсыбыт үөрэх уонна научнай литература устуоруйатыгар экспертнэй бөлөҕү тэрийэн үлэлэтии сабаҕаланар. Үрдүк үөрэх кыһаларыгар атамаан идэтийбит анал куурустарын ыытыы былааннанар, ону таһынан казак кылааһын бэрэстэбиитэллэригэр тус сыаллаах педагогическай хайысхалаах үөрэхтэргэ ылыахтара.
РФ Наукаҕа уонна үрдүк үөрэхтээһиҥҥэ министрэ Валерий Фальков ассоциацияҕа киирбит университеттар үлэлэрэ-хамнастара казактар уопсастыбаларыгар каадыры бэлэмнээһиҥҥэ туһаайылларын, судаарыстыбаннай уонна муниципальнай сулууспаны ааһалларыгар казактарга тус сыаллаах үөрэх ыытыллар буоларын бэлиэтээтэ. «Ассоциация сүрүн соругунан Арассыыйа казачествотын устуоруйатын үөрэтии буолуоҕа», — диэн миниистир эттэ.
Мунньах кыттыылаахтара үрдүк үөрэх кыһаларыгар ыччаты казачествоҕа анаан үөрэтии, казактар уопсастыбаларыгар уонна казактар уопсастыбаннай түмсүүлэригэр каадыр резервэтин тэрийэр кыаҕы үөскэтэрин бэлиэтээтилэр. Кэлэр өттүгэр кыһаны бүтэрээччилэр атамаан, атамаан солбуйааччыта уонна казактар уопсастыбаларын ыстааптарын салайааччылара буолан тахсыахтара, ону тэҥэ казак уопсастыбатын экономическай үлэтин- хамнаһын, судаарыстыба сулууспатын, култуураны уонна казачество үөрэҕин систиэмэтин сайыннарыахтара.