Мииринэй улууһун Айхал бөһүөлэгэр Уһук хоту дойду уустук усулуобуйатыгар “Уһук Илиҥҥи гектарга” Игорь Бородин тэпилииссэ хаһаайыстыбалаах. Урбаанньыт сылы эргиччи оҕурсу, томат, минньигэс биэрэс уонна күөх үүнээйи үүннэрэр. Айхал олохтоохторо бородууксуйаны социальнай ситимнэргэ тахсар биллэриинэн хамаҕатык атыылаһаллар. Игорь Бородин Уһук Илин уонна Арктика сайдыытын корпорациятыгар инники былаанын туһунан кэпсээтэ.
“Уһук Илиҥҥи гектарынан” сири биһиги дьиэ кэргэммит 2019 сыллаахха ылбыта. Учаастагы талан баран НаДальнийВосток.рф. портал нөҥүө онлайн-эрэсииминэн сайаапка биэрбиппит. Докумуоннары түргэнник толорбуппут. Гектарбыт дьиэбититтэн чугас буолан, уута-уота барыта баара. 2020 сыллаахха тэпилииссэ тутан, бастакы хомуурбутун ылбыппыт. Бары дьиэ кэргэнинэн үлэлиибит – кэргэним Наталья уонна уолаттарым Максим, Матвей көмөлөһөллөр”, — диир Игорь Бородин.
Бырагыраама кыттыылааҕа Уһук Хоту дойдуга оҕуруот аһа олус күндү диир. Бородин оҕуруотун аһа ыал остуолугар быһалыы киирэр. Ону тэҥэ киһи доруобуйатыгар буортута суох уонна туһалаах бородууксуйа.
Урбаанньыт этэринэн, Саха сиригэр помидорга олус наадыйаллар. Ол иһин тэпилииссэҕэ “Батяня”, “Сибирский банан” томаттары үүннэрэллэр. Минньигэс биэрэс, эриэппэ луук ситэр, салааттар да бэркэ үүнэллэр.
“Кэҥиэхпитин баҕарабыт. 2022 сылга бу учаастак таһыгар иккис тэпилииссэбит тутуллуоҕа. Ирбэт тоҥ мэһэйдээбэт – тэпилииссэлэрбит түгэҕэр халыҥнык мас көөбүлүн тэлгэппиппит, кирээдэлэргэ ититэр ситим турбата тардыллыбыта. Өссө гааһынан сылытыллар биэс тэпилииссэни тутар баҕалаахпыт. Дьон туохха наадыйарын билэбит, үлэбитин сатыыбыт, бырагырааманан ылбыт сирдээхпит. Учаастакпытын бас билиигэ хайдах толотторору билигин толкуйдуубут”, — диэн эбэн эттэ Бородин.
Сири бас билиигэ эбэтэр уһун болдьохтоох түүлэһигэ дуогабары түһэрсибит кэннэ түөрт аҥаар сылынан “Уһук Илиҥҥи гектар” түөрт киритиэрийигэр сөп түбэһээччилэр толоттороллор. Бастакыта – сир учаастагар хапытаалынай тутуу баар буолуохтаах. Иккис – бу сиргэ 30 тыһ. кырата суох үп угуллубут буолуохтаах. Үсүһүнэн – учаастакка оҥоһуллубут бородууксуйаттан киирэр дохуот 30 тыһ. кырата суох. Төрдүһүнэн – учаастагы туһаныыга түмүгү ситиһии.
Сир учаастагын сөпкө туһана сылдьабын диэн иһитиннэриини бу гектарынан дуогабар түһэрсиллибитэ 4,5 сыл буолан баран биэриэххэ сөп. Сирин учаастагар 24 кв. м кырата суох иэннээх, ол бырааба ЕГРН регистрациялаах олорор дьиэлээх буоллаҕына гражданин 4,5 сыл туола да илигинэ иһитиннэрии уонна сир учаастагын болдьоҕун иннинэ бас билиигэ биэрэллэригэр сайабылыанньа биэрэр кыахтаах. Маны сэргэ “гектардарыгар” дьиэ туттар эбэтэр туттубут “Уһук Илиҥҥи ипэтиэкэ” бырагыраама кыттыылаахтара учаастактарын болдьоҕун иннинэ бас билиигэ толоттороллор.
Бас билиигэ толотторууга докумуону почта нөҥүө кумааҕы көрүҥүнэн сир учаастагын биэрэр боломуочуйалаах уоргаҥҥа ыытыллар. Сайабылыанньаны МФЦ нөҥүө эмиэ биэрэллэр эбэтэр электроннай көрүҥүнэн тус кэбиниэт нөҥүө «НаДальнийВосток.РФ»
Бэлэмнээтэ Женни Стрюкова
Хаартыска: тустаах саайтан