Нацбырайыактар Тыа хаһаайыстыбата

«Уһук Илиҥҥи гектар»: Чукотка туундаратыгар «УМКА» глэмпинг-база тутуллар

Чукотка олохтооҕо, байыаннай биэнсийэлээх, урбаанньыт Максим Крупеня сир учаастагын ылан глэмпинг киэбинэн сынньалаҥ базатын оҥоро сылдьар.

 

Чукоткаҕа, айылҕа биир кэрэ муннугар, Дауркин тумул арыытыгар (Лаврентий сэлиэнньэттэн 22 километрдаах сиргэ) «УМКА» («Удивительные маршруты, комфортная атмосфера») бырайыагынан аныгы ирдэбилгэ эппиэттиир глэмпинг база бастакы түһүмэҕэ – түөртүү киһи олорор кыахтаах, биэс геокупол оҥоһулунна. Аһыырга уонна араас тэрээһиннэри ыытарга туспа купол-party баар.

Урбаанньыт Максим Крупеня бу базаны «Уһук Илиҥҥи гектар» сокуонунан сир учаастагын ылан оҥоһунна. Геокуполлар тастарынан манна төрүт олохтоох омуктар култуураларын билиһиннэрэр, спорт национальнай көрүҥнэрин былаһааккалара уо.д.а. баар буолуохтара. База сайыҥҥы үс ыйга (от ыйыгар, атырдьах ыйыгар уонна балаҕан ыйыгар) үлэлиэҕэ, онтон атын кэмҥэ хомуйуллар, арай мас пандустар (геокуполлар акылааттара) уонна санитарнай блок эрэ хаалар. Билигин туристартан бастакы сайаапкалар киирэн эрэллэр эбит. Максим Крупеня саппааска тахсыбыт офицер, Лаврентий сэл. баар байыаннай чаастан биэнсийэҕэ тахсан, туристическай бизнеһинэн дьарыктанар урбаанньыт буолбут.

Раиса Сибирякова, «Саха сирэ», edersaas.ru

0
0