2016 сыллахтан “Уһук Илиҥҥи федеральнай уокурук састаабыгар киирсэр Россия Федерациятын субъектарын сиригэр-уотугар судаарыстыбаннай, муниципальнай бас билиигэ баар сир учаастактарын гражданнарга биэрии уратытын уонна Россия Федерациятын сорох сокуоннарын актатыгар уларытыылары киллэрии туһунан” сокуон үлэлиир.
Саха Өрөспүүбүлүкэтигэр бу сокуоҥҥа тирэҕирэн, уонунан тыһыынча киһи сир ылан, үлэ-хамнас араас көрүҥүн тэриннэ. Онуоха сири тыа сирин дьоно эрэ буолбакка, оробуочай бөһүөлэктэр олохтоохторо эмиэ ылаллар.
Мирнэй оройуонун Айхал бөһүөлэгин олохтооҕо, түөрт оҕолоох ыал ийэтэ, идэтинэн английскай тыл учуутала Виктория Чекушкина бу сокуону кэскиллээхтик туһанна. Айхал бөһүөлэгин килбэйэр киинигэр сир учаастагын ылан, 100 кв. миэтэрэ иэннээх дьиэни туттан, Тыл оскуолатын арыйан үлэлэтэр.
– Омук тылын үөрэтиигэ өҥө оҥоруутун сэттэ сыллааҕыта саҕалаабытым. Баҕалаах оҕо элбэх буолан үлэлииргэ үчүгэй этэ. Ол эрээри, наар кылаас куортамнаһарга күһэллэрим. Инньэ гынан, Уһук Илиҥҥи гектар сокуонунан 0,02 гектардаах сир учаастагын ыламмын, дьоҕус оскуола дьиэтин туттубутум, – диир Виктория Чекушкина.
Икки кэбиниэттээх саҥа дьиэ бэрт тупсаҕай оҥоһуулаах, толору хааччыллыылаах, оҕолор үөрэ-көтө үөрэнэ, дьарыктана кэлэр сирдэрэ буолбут. Виктория сирин участагын үс сыллааҕыта ылбыт, онон сокуоҥҥа сөп түбэһиннэрэн, сири туһаныы туһунан декларацияны толорбут, сотору кэминэн сирин бас билиигэ докумуоннатар баҕалаах. Даҕатан эттэххэ, маннык декларацияны өрөспүүбүлүкэ үрдүнэн номнуо 18,3 тыһыынча киһи толордо. Сир учаастагын биэс сыл туһаммыт киһи ол сирин бас билиигэ эбэтэр уһун болдьохтоох түүлэһиигэ ылыан сөп. Уһук Илиҥҥи гектар сокуона быйылгыттан Арктика улуустарыгар эмиэ киллэрилиннэ.
Раиса Сибирякова.