Уһук Илиҥҥи федеральнай уокурукка сокуону сөптөөхтүк туһаныыга сыһыаннаах мунньах буолла
Владивостокка ыам ыйын 31 күнүгэр Арассыыйа генеральнай прокуратуратын итиэннэ Уһук Илини уонна Арктиканы сайыннарыы министиэристибэтин икки ардыларынааҕы сүбэ мунньах буолан ааста.
edersaas.ru
Тэрээһиҥҥэ Арассыыйа бырабыыталыстыбатын бэрэссэдээтэлин солбуйааччы, Уһук Илиҥҥи федеральнай уокурукка Бэрэсидьиэн боломуочуйалаах бэрэстэбиитэлэ Юрий Трутнев, Арассыыйа генеральнай прокурорун солбуйааччы Дмитрий Демешин, Уһук Илини уонна Арктиканы сайыннарыы миниистирэ Алексей Чекунков, Уһук Илин федеральнай уокуругун эрэгийиэннэҕи прокурордара, сайдыы институттарын салайааччылара, федеральнай былаас, общественнай тэрилтэлэр бэрэстэбиитэллэрэ кыттыыны ыллылар.
Бу мунньахха Саха сирин Ил Дархана Айсен Николаев кыттыыны ылла.
Тэрээһиҥҥэ ТОР (урутаан сайдыы территорията) уонна Владивосток көҥүл пордун сирдэригэр ыытыллар үлэлэри сокуонунан хааччыйыы боппуруостара ырытылыннылар. Ону таһынан экэниэмикэҕэ административнай ыгыыны аччатыы, коррупцияны утары охсуһуу кыһалҕалара таарылыннылар.
Ырытыы түмүгүнэн балаһыанньаны тупсарар миэрэлэр үлэҕэ киирэллэрэ күүтүллэр. Министиэристибэ уонна прокуратура ыкса үлэлэрэ туһалаах буолуо диэн кыттааччылар эрэл санааларын биллэрдилэр.
«Саха сирэ» хаһыат, edersaas.ru
Хаартыска sakha.gov.ru