Арассыыйа Почтата уонна бэчээт эйгэтэ тэрийбит уон күннээх аахсыйаларыгар, Уһук Илин эрэгийиэн олохтоохторо 40 тыһыынча хаһыакка, сурунаалга суруттулар. Итини сэргэ, Арассыыйа Почтата өссө бэс ыйын 1-10 күннэригэр сурутуу дэкээдэтигэр ыҥырарын туһунан СӨ ФПСУ пресс-сулууспата иһитиннэрэр.
Сурутуу сааскы дэкээдэтэ муус устар 20—30 күннэригэр ыытыллыбыта. Бу кэмҥэ чэпчэтиллибит сыананан дьон оҕолорго аналлаах сурунаалларга, хаһыаттарга суруппута. Приморье кыраайын олохтоохторо Бүтүн Арассыыйатааҕы уонна оройуоннарын хаһыаттарыгар ордук суруттарбыттар. Амур уобалаһын уонна Хабаровскай кыраай олохтоохторо киин хаһыаттарга суруппуттар. Маныаха Саха сирэ ааҕарын саамай таптыыр өрөспүүбүлүкэнэн сыаналанна. Сахалыы уонна нууччалыы тылынан тахсар хаһыаттарга, сурунаалларга, уопсайа 17 тыһыынча сурутуу оҥоһуллубут. Бу туһунан sakha.gov.ru суруллар.
«Билигин сурутуу өссө табыгастаах буолла. Арассыыйа Почтатын онлайн каталога кэҥээтэ, өрөспүүбүлүкэ уонна улуустар хаһыаттарын испииһэктэрин көрөн олорон сурутуохха сөп. Маныаха улуустар хаһыаттарыгар сыана чэпчээһинэ оруоллаах буолуоҕа. Онон, сурутуу сайыҥҥы дэкээдэтэ үчүгэй буоларыгар эрэнэбит«, — диэн СӨ ФПСУ сурутууга отделын салайар Ньургуйаана Бурцева эттэ.
Бэс ыйын 1-10 күннэригэр Арассыыйа Почтата сурутуу дэкээдэтин саҕалыа. Дьиэҕэ олорон сурутар биэнсийэлээхтэргэ, почта отделениеларыгар тиийбиттэргэ аахсыйа кэмигэр почтальоннар, оператордар көмөлөһүөхтэрэ. Чэпчэтиилэр 40%-ҥа тиийиэхтэрэ. Маны таһынан, интэриниэтинэн сурутуу эмиэ баар. Чэпчэтиилээхтэри онлайн каталокка көрүөххэ сөп. Сайтка маннык аадырыһынан киирэҕит: https://podpiska.pochta.ru уонна мобильнай сыһыарыыларга атын өҥүнэн бэлиэтиэммит буолуоҕа. Бэлиэтээн эттэххэ, чугас дьоҥҥутугар бэлэх оҥорон эбэтэр көмөлөһөн, хаһыаты, сурунаалы интэриниэтинэн сурутан биэрдэххитинэ, дойду хайа баҕарар эрэгийиэнигэр тиэрдиллэр.
Дьиэлэригэр хааччахтанан олорор аҕам саастаахтар 8-800-1-000-000 ньүөмэргэ эрийэн (босхо), мобильнай почтальону дьиэҕитигэр ыҥырыаххытын сөп. Оччоҕуна, эһиги дьиэҕититтэн чугас почтаттан почтальон тус бэйэҕитигэр төлөпүөннээн, сурутууну хаһан оҥоро тиийэрин болдьоһуохтаах.
Маны таһынан, Арассыыйа Почтата «Дерево добра» аахсыйаҕа кыттарга ыҥырар. Сэҥээрбиттэр podpiska.pochta.ru/derevo-dobra сайтка киирэҥҥит, социальнай тэрилтэлэргэ, бэтэрээннэр дьиэлэригэр хаһыакка, сурунаалга сурутан бэлэх оҥоруоххутун сөп.