Уһук Илиҥҥи уокурукка устудьуоннуур саха Кэрэ Куотун аата ааттанара чугаһаата. “Мисс студенчество Саха-Дальний Восток” Уһук Илиҥҥи уокурукка үөрэнэр кэрэчээнэлэри түмэр улахан куонкурус. Дьокуускай, Благовещенскай, Владивосток, Хабаровскай куораттартан сүүмэрдээһини ааспыт аҕыс кыыс көрөөччү, дьүүллүүр сүбэ иннигэр тахсан, хоруона иһин күрэстэһиэхтэрэ.
Варвара Попова, “Саха сирэ” хаһыат, edersaas.ru
Куонкурус сүрүн сыалынан бу уокурук улахан куораттарын икки ардыгар култуурунай уонна иллээх сыһыаны бөҕөргөтүү, устудьуоннар ортолоругар патриотическай тыыны иҥэрии буолар. Уокурук иһинэн маннык хабааннаах тэрээһин бастакытын ыытыллар. Ол эрээри тэрийээччилэр Хабаровскай куоракка үөрэнэр устудьуон кыргыттар ортолоругар “Мисс Саха-Хабаровск” диэн куонкуруһу сэттэ сыл устата ыыппыт улахан уопуттаахтар. Кинилэр итини салгыы сайыннаран, географиятын кэҥэтэн, билигин Уһук Илиҥҥи уокурук улахан куораттарын хабан, кырдьыга да, устудьуоннары сомоҕолуур сыаллаахтар.
Үөһээ ааттаммыт куораттарга баар саха устудьуоннарын землячестволара бэйэлэрин бэрэстэбиитэллэрин бу куонкуруска талан бэлэмнииллэр. Дьокуускайтан ХИФУ устудьуоннара Валентина Игнатьева уонна Анисия Скрыбыкина кыттыахтара. “Ыччат ортотугар эдэр кыыс кэрэтин сэргэ өйдөөх, айар куттаах, бары өттүнэн талааннаах, доруобай буолуохтаах диэн өйдөбүлү тиэрдэр сыаллаахпыт. Маны таһынан, ыччат ортотугар чөл олоҕу, бэйэ-бэйэҕэ убаастабыллаах сыһыаны олохтуур санаанан салайтарабыт”, — диэн Хабаровскайдааҕы “Хардыы” землячество бэрэссэдээтэлэ, тэрийээччи Ньургун Скрыбыкин санаатын үллэстэр.
Варвара Попова, “Саха сирэ” хаһыат, edersaas.ru