Уһук Илин эрэгийиэнигэр саҥа куорат тутар былааннаахтар. Уһук Илини сайыннарар министиэристибэ салайааччыта Алексей Чекунков этэринэн, Спутник куорат аныгылыы көстүүлээх уонна киһи олороругар саамай табыгастаах буолуоҕа.
Саҥа куоракка Азиатскай-Тихоокеанскай эрэгийиэн кыбаарталлара баар буолуохтара. Холобур: дьоппуоннар, кытайдар, кэриэйдэр кыбаарталлара, о.д.а. Бырайыагын оҥорорго бу дойдулар архитектордарын ыҥырбыттар.
Бу иннинэ оборуона миниистирэ Сергей Шойгу Сибииргэ научнай-бырамыысыланнай, экэнэмиичэскэй киин буолар кыахтаах хас да бөдөҥ куораттары тутуохха диэн этии киллэрбитэ. Онтон Уһук Илини сайыннарар министиэристибэ Владивосток куораттан 30 килэмиэтирдээх сиргэ 300 тыһыынча киһиэхэ анаммыт Спутник куораты тутар былаан баарын иһитиннэрбиттэрэ. Куораты тутуу бастакы түһүмэҕэр 100 миллиартан тахса солкуобай барыахтаах. Спутник киһи олороругар саамай табыгастаах, барыта толкуйдаммыт, аныгы куорат буолуохтаах.
Бу идиэйэни Уһук Илин олохтоохторун сорохторо сөбүлээбэтэхтэрин биллэрбиттэрэ. Холобур, Магадан сорох олохтоохторо этэллэринэн, саҥа куораты тутан, үлүгэр үбү бараабакка, билиҥҥи куораттары сайыннарбыт ордук.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru