2017 сылга Уһук Илиҥҥи федеральнай уокурукка үөрэнээччилэр, устудьуоннар уонна үлэлиир исписэлиистэр ортолоругар Федерация Сэбиэтин чилиэнэ Вячеслав Штыров бирииһигэр үгэс буолбут куонкурус ыытыллыаҕа. Куонкурус техническэй толкуйдаах оҕолору оскуола эрдэхтэн булууга, устудьуон-инженердэр уонна исписэлиистэр бырайыактарын өйөөһүҥҥэ ананар.
Куонкурус уруккутун курдук үс хайысханан ыытыллар: “Кэнэҕэски инженер” (8-10 кылаастарга), “Эдэр инженер” (үрдүк уонна орто үөрэх кыһалара), “Идэтийбит инженер” (35 диэри саастаах, тэрилтэлэргэ инженернэй үлэнэн дьарыктанар исписэлиистэр). Кыттааччылар тутуу индустрията, сир баайын хостооһун, геология, туһалаах сир баайын чинчийии уонна арыйыы, сибээс, иһитиннэрэр технологиялар, инфраструктура, уоту кэмчилээһин, медицинскэй технологиялар, аграрнай технологиялар, ас-үөл бородууктатын технологиялара тиэмэлэргэ кыттыахтара.
Уһук Илиҥҥи “Мин – инженербин” куонкурус үс түһүмэҕинэн барыаҕа. Бастаан кэтэхтэн сүүмэрдээһин ыытыллыаҕа. Үлэлэри ыам ыйын 15 күнүгэр диэри тутуохтара уонна үлэҕитин электроннай почтанан yaingenerkonkurs@mail.ru ыытыахтааххыт. Иккис түһүмэх – сүүмэрдээһин: “Кэнэҕэски инженер”хайысхаҕа бастакы түһүмэх кыайыылаахтарын ортолоругар 2017 сыл атырдьах ыйын 5 күнүттэн 25 күнүгэр диэри Дьокуускайга “Сосновый Бор” оҕо лааҕырыгар ыытыллар. Устудьуоннар уонна үлэлиир инженердэр 2017 сыл от ыйыгар “Синергия Севера” Уһук Илиҥҥи ыччат үөрэтэр форумугар түмсүөхтэрэ.
Үһүс түмүктүүр түһүмэх 2017 сыл сэтинньи 30 күнүгэр диэри буолуоҕа. Куонкурус балаһыанньатын кытта http://va-shtryrov.ru/cataktsenty/ya-inzhener билсиҥ.
Куонкурус тэрийэр кэмитиэтэ “Кэнэҕэски инженер” хайысхаҕа үһүс түһүмэх кыттыылаахтарыгар үрдүк уонна анал орто үөрэх кыһаларын кытта анал үөрэххэ дуогабардары түһэрсэргэ сүбэлиир. Оттон устудьуоннары Уһук Илиҥҥи федеральнай уокурукка хампаанньаларга үлэҕэ киирэллэригэр көмөлөһөр.
Куонкуруһу көҕүлээччи, Федерация Сэбиэтин чилиэнэ Вячеслав Штыров дойду научнай-инженернэй кыаҕын чөлүгэр түһэрэргэ эрэнэр. Маныаха уопсастыбаннаһы, ордук эдэрдэри, инженернэй дьыалаҕа уонна инженер статуһун үрдэтиигэ көҕүлүөххэ наада. “Ыччаты идэҕэ тардарга бу идэҕэ интэриэһи үөскэтиэххэ. Оҥорон таһаарыы, инженер идэтэ – бу эдэр дьоҥҥо интэриэһинэй уонна үчүгэй хамнастаах үлэни ылар кыаҕы биэрэр, оттон дойдуга – идэлэрин баһылаабыт каадырдары уонна оҥорон таһаарыыны үрдэтиини. Ол иһин биһиги “Мин – инженербин” куонкуруһу ыытабыт”, — диэн бэлиэтээтэ сенатор.
Санатан эттэххэ, куонкурус СӨ Бырабыыталыстыбатын, СӨ Ыччат уонна дьиэ кэргэн дьыалаларыгар министиэристибэтин, СӨ Үрдүкү Инженернэй сэбиэтин, СӨ “Мин – инженербин” техническэй исписэлиистэри сүрүннүүр киин” уопсастыбаннай тэрилтэтин, “Точка ОПОРЫ” гражданскай уопсастыба сайдыытын фондатын өйөбүллэринэн ыытыллар. Тэрийэр кэмитиэт бэрэссэдээтэлинэн Саха Өрөспүүбүлүкэтин Бырабыыталыстыбатын Бэрэссэдээтэлэ Евгений Чекин буолар.
Куонкурус 2016 сыллааҕы кыайыылааҕа Василий Шишигин интервьютун манна ааҕыҥ.
Хаартыскаҕа: «АЛРОСА» инженерэ, «Мин — инженербин» куонкурус бастакы кыайыылааҕа Ньургун Захаров.
Ольга Фомина.