«Уһук Илиҥҥэ – мин этиилэрим» диэн бырайыак чэрчитинэн, өрөспүүбүлүкэ уопсастыбаннай түмсүүлэриттэн, олохтоохтортон бүгүҥҥү туругунан уопсайа 89 этии киирдэ.
edersaas.ru
«Уһук Илиҥҥэ – мин этиилэрим» диэн бырайыак Саха Өрөспүүбүлүкэтин көҕүлээһининэн ыытыллар. Дойду бэрэсидьиэнэ Владимир Путин Илиҥҥи үһүс экэнэмиичэскэй форум пленарнай мунньаҕар Уһук Илини 2025 сылга диэри сайыннарыы национальнай бырагырааматын оҥорор туһунан сорудахтаабыта. Тута, Ил Дархан Айсен Николаев өрөспүүбүлүкэ олохтоохторун этиилэрин, санааларын түмэр туһунан этии киллэрэн, Уопсастыбаннай балаата, Ил Дархан саайтын уонна да атын порталлар нөҥүө санаалары бииргэ сиргэ түмүү саҕаламмыта.
СӨ Уопсастыбаннай балаататын чилиэннэрэ Уһук Илин эрэгийиэнин сайыннарыыга дьон-сэргэ туох санаалаахтарын, этиилээхтэрин истээри, Дьокуускайга, Нерюнгрига, Алдаҥҥа, Ленскэйгэ, Намҥа, Горнайга, Хаҥаласка уонна Орто Халымаҕа «төгүрүк остуоллары» тэрийэн ыыппыттара.
Бу күннэргэ өрөспүүбүлүкэтээҕи медиа-кииҥҥэ Саха Өрөспүүбүлүкэтин, Забайкальскай, Хабаровскай кыраайдар, Сахалин, Бурятия уонна Камчатка уопсастыбаннай балааталарын чилиэннэрэ кыттыылаах онлайн-сүбэ мунньах буолла.
СӨ Уопсастыбаннай балаататын социальнай бэлиитикэҕэ хамыыһыйатын бэрэссэдээтэлэ Лена Ефремова иһитиннэрбитинэн, Нерюнгри уонна Алдан оройуоннарыгар ыытыллыбыт «төгүрүк остуоллар» кэмнэригэр олохтоохтор ордук экология боппуруоһун көтөхпүттэр. Маны таһынан, суол-иис, демография боппуруостарын уонна нэһилиэнньэ ахсаанын элбэтэр сыалтан «Уһук Илин хапытаал» диэни олоххо киллэрэр оруннааҕын эппиттэр.
Оттон уопсастыбанньык Вера Душкевич инбэлиит дьону үлэнэн хааччыйыы, эмтэнэ баралларыгар суол-иис боппуруоһун быһаарыы туһунан этии киллэрдэ.
Доруобуйа харыстабылын салаатыгар элбэх интэриэһинэй этиилэр киирбиттэр. Дьокуускай куорат 3-с нүөмэрдээх балыыһатын кылаабынай бырааһа Светлана Давыдова Уһук Илин эрэгийиэннэрин ураты клиимэтин учуоттаан туран, доруобуйа харыстабылыгар атын нормативтары киллэрэр туһунан, итиэннэ эр киһи доруобуйатыгар улахан болҕомто ууруллуохтааҕын бэлиэтээтэ.
Сүбэ мунньахха атын эрэгийиэннэр уопсастыбанньыктара быһа сибээскэ тахсан, Уһук Илин сайдыытыгар бэйэлэрин этиилэрин киллэрдилэр. Ол курдук, камчаткалар хотугу таһаҕаһы тиэйии, хабаровскайдар маһы таҥастааһын салааларыгар этиилэрдээхтэрин иһитиннэрдилэр.
Өрөспүүбүлүкэ олохтоохторуттан, тэрилтэлэртэн, уопсастыбаннай түмсүүлэртэн киирбит интэриэһинэй этиилэри барыларын түмэн баран, Ил Дархан Айсен Николаевка биэриэхтэрэ.
Онон, ханнык баҕарар киһи эрэгийиэммит сайдыытыгар туһулаан бэйэҕит этиилэргитин киллэриэххитин, санааҕытын атастаһыаххытын сөп.
Анивера Акимова, edersaas.ru