Маны аах Уопсастыба

Уһук Илиҥҥэ болҕомто күүһүрэр

Бэҕэһээ РФ баһылыга Владимир Путин улахан пресс-кэмпириэнсийэтигэр дойду бырабыыталыстыбата Уһук Илин сайдыытыгар уонна ону өйөөһүҥҥэ ыытыллар үлэлэргэ тохтоото.

«Уһук Илин бэйэтигэр ураты болҕомтону эрэйэр -– ити биир кэлим үлэ. Уһук Илин олоҕо аныгы усулуобуйатынан киһини бэйэтигэр тардыахтаах. Онуоха туох нааданый? Экэниэмикэни сайыннарыахтаахпыт, үрдүк технологиялаах, интэриэһинэй уонна үрдүк хамнастаах оробуочай миэстэлэри таһаарыахтаахпыт.

Иккиһинэн, манна тупсаҕайдык олорор туһугар, биллэн турар, социальнай хайысханы сайыннарыахтаахпыт, Русскай арыы уонна үөрэх атын тэрилтэлэрин бөҕөргөтүөхтээхпит, оскуолалары, оҕо уһуйааннарын тутуохтаахпыт. Онуоха биһиэхэ улахан бырагыраама баар. Ол иһигэр, урутаан сайдар анал зоналары тэрийии, кирэдьииккэ чэпчэтиилээх көрүҥнэр уо.д.а. Бүтүн класстердар сайдаллар. Былааннар, уһун кэмнээх цикл үлэлэрэ бааллар. Үлэ барар уонна балаһыанньа тупсар», -– диэн дойду аҕа баһылыга бэлиэтээтэ.

Владимир Путин Уһук Илиҥҥэ бэрэсидьиэн боломуочуйалаах бэрэстэбиитэлэ Юрий Трутнев хамаандатын Уһук Илин социальнай-экэнэмиичэскэй эйгэтин сайдыытыгар сыралаах үлэтин түмүктэрин үтүөтүк сыаналаата.

Надежда ЕГОРОВА, «Саха сирэ», edersaas.ru

 

 

0
0
Telegram @edersaas20