Сүрүн Экэниэмикэ

Уһук Илиҥҥэ биисинэһи өйөөһүн көдьүүһүн дьүүллэстилэр

Бэс ыйын 8 күнүгэр дойдуга ис хааччахтааһын усулуобуйатыгар  Уһук Илиҥҥэ  биисинэһи  судаарыстыба өйөөһүнүн көдьүүһүн үрдэтэр дьаһаллар тустарынан  РФ Генеральнай прокуратурата, Уһук Илин уонна Арктика сайдыыларыгар  РФ министиэристибэтэ дьүүллэстилэр.

 

Уһук Илиҥҥэ РФ Генеральнай прокуратуратын управлениета иһитиннэрэринэн, Владивосток куоракка  ыытыллыбыт биэдэмэстибэлэр икки ардыларынааҕы мунньахха  Уһук Илиҥҥи сиргэ-уокка көдьүүстээх эрэсиимнэр сайдыыларын, биисинэскэ административнай күһэйиини намтатыы боппуруостарын көрдүлэр.

Дьаһалга  Саха сирин Ил Дархана Айсен Николаев кытынна.

РФ Генеральнай прокурорун солбуйааччы Дмитрий Демешин мунньаҕы аһарыгар  Уһук Илин Арассыыйаҕа Азия-Тиихэй акыйаан эрэгийиэнин ырыынактарыгар саҥа “аанынан” буолан эрэрин бэлиэтээтэ.

Мунньахха этиллибитинэн,  Арассыыйа бизнесменнэрин 77% саҥа усулуобуйаҕа үөрэннэ, атыттар, ол эбэтэр 23% кэккэ ыарахаттары көрүстүлэр.  Онно тустаах тэриллэри, матырыйааллары  тириэрдии болдьоҕун уһатыы,  үбүлээһин кыһалҕалара, үлэни толоруу болдьоҕун уһатыы уо.д.а. киирэллэр.

Уокурукка судаарыстыбаннай уонна муниципальнай хантараактарга сакаасчыттар  урбаанньыттарга уһаппыт  иэстэрин уопсай суумата 460-тан тахса мөлүйүөҥҥэ тэҥнэстэ. Ордук элбэх иэстээхтэринэн Забайкалье, Хабаровскай кыраайдар, Бурятия Өрөспүүбүлүкэтэ уонна Сахалин уобалаһа ааттаннылар.

Дмитрий Демешин мунньах кыттыылаахтарыгар Уһук Илиҥҥэ суол ситимин инфраструктурнай тутуу тэтимин түргэтэтэргэ судаарыстыба баһылыгын сорудаҕын учуоттаан,   чугастааҕы 5 сылга улахан күүһү уурарга эттэ.

РФ бырабыыталыстыбатын бэрэссэдээтэлин солбуйааччы-Уһук Илиҥҥэ РФ бэрэсидьиэнин боломуочуйалаах бэрэстэбиитэлэ Юрий Трутнев инвестиция, тутуу үлэтин кээмэйдэрин  уонна бырамыысыланнас үлэтин улаатыннарыы тэтимэ Арассыыйа орто көрдөрүүтүн 1,5-2 төгүл аһарарын туһунан эттэ.

Надежда ЕГОРОВА, «Саха сирэ», edersaas.ru

0
0
Telegram @edersaas20