Уһук Илин Федеральнай уокуругугар эрэгийиэннэр икки ардыларыгар салгын тырааныспарынан субсидиялаах көтүүгэ анаан судаарыстыбаттан 2021 сылга 1,58 миллиард солкуобай көрүллүөҕэ. Туһааннаах дьаһалга РФ бырабыыталыстыбатын бэрэссэдээтэлэ Михаил Мишустин илии баттаата.
Саппаас пуондаттан социальнай суолталаах 20 хайысхаҕа үбүлээһин көрүллэн, авиабилиэт сыаната лаппа чэпчиэҕэ. Олор истэригэр Хабаровскай — Дьокуускай, Хабаровскай – Анадырь, Петропавловскайдааҕы Камчатка — Сахалин, Владивосток – Чита, Комсомольскайдааҕы Амур – Благовещенскай киирдилэр. Билиэт сыаната 2,2 — 10,9 тыһыынча солкуобай буолуоҕа (биир өттүгэр).
Бырабыыталыстыба мунньаҕар Михаил Мишустин иһитиннэрбитинэн, чэпчэтиллибит тарыыбынан сылга 100 тыһыынча кэриҥэ киһи туһанар кыахтаныаҕа. Быйыл 1 780-тан итэҕэһэ суох чэпчэтиилээх билиэттэрдээх рейстэр тэриллиэхтэрэ.
20 социальнай суолталаах хайысханан көтүүлэр саҥа тэриллэр холбоһуктаах авиахампаанньа бастакы рейстэринэн буолуохтара. Санатан эттэххэ, саҥа авиахампаанньа РФ бэрэсидьиэнэ Владимир Путин сорудаҕынан “Аврора” АХ баазатыгар тэриллэр.
Ылыныллыбыт быһаарыыны Уһук Илин эрэгийиэннэрин икки ардыларыгар көтүүгэ ордук табыгастаах буолуоҕа.
edersaas.ru