«Уһук Илиҥҥэ 1000 тиэргэн» бырагырааманан саҥардан, уларытан, тупсаран оҥоруу үлэтэ Саха сиригэр тиһиктээхтик салҕанар.
Бу күннэргэ Бүлүү, Нам уонна Хаҥалас улуустарын олохтоохторо киэркэйбит, тупсубут былаһааккаларын үөрэ-көтө көрдүлэр-иһиттилэр.
—Тиэргэни уонна уопсастыбаннай сынньанар сири саҥардан оҥоруу олох хаачыстыбатын тупсарар. Маныаха, бырайыакка улахан куораттар эрэ буолбакка, өрөспүүбүлүкэ нэһилиэнньэлээх пууннара кытары киирэллэрэ ордук үөрүүлээх, — диэн бэлиэтиир СӨ Ил Дархана Айсен Николаев.
Ол курдук, Ымыйахтаах (Нам улууһа) олохтоохторо саҥа мини-пааркаланан сүргэлэрэ улаханнык көтөҕүлүннэ. Манна, сэлиэнньэ киинигэр, урут хотон турбут. Оттон билигин болҕомтону тардар, дьон-сэргэ дуоһуйа сынньанар сирдэннэ. Манна хачыал, успуордунан дьарыктанар уонна оонньуур сирдэр, ыскамыайкалар барыта олохтоохтор тустарыгар оҥоһулунна.
Хаҥаласка Булгунньахтаах олохтоохторо эмиэ итинник кыра пааркаланан үөрэ-көтө сылдьаллар. Урут бу сир кураанах турбут буоллаҕына, билигин чугастааҕы дьиэлэртэн эрэ буолбакка, сэлиэнньэ хайа баҕарар муннугуттан оҕо-уруу чуо манна тардыһар буолбут. Манна дьон хаамарыгар, бэлисипиэти тэбэригэр анаан оҥоһуллубут ыллыктар, дуоһуйа хатааһылыырга скейт-былаһаакка, доруобуйаны чэбдигирдэргэ, успуордунан дьарыктанарга воркаут-зона, оҕо оонньуур бэртээхэй былаһаакката бааллар.
Кыһыл Сыырга (Бүлүү) Аммосов аатынан уулуссаҕа олохтоохтор киэн туттар уонна үөрэ-көтө мустар сирдэннилэр. Бу миэстэҕэ урут эргэ хоспохтор, сарайдар турбуттар, кытаанах бөх-сах быраҕыллан сыппыт. Оттон билигин оҕолор астына оонньуур, эдэрдэр успуордунан дьарыктанар, аҕам саастаахтар үөрэ-көтө доруобуйаларын чэбдигирдинэн, атах тэпсэн олорон сэһэргэһэр былаһааккаламмыттар.
Санатан эттэххэ, Уһук Илин нэһилиэнньэлээх пууннарыгар тыһыынчанан тиэргэни саҥардан, тупсаран, уларытан оҥорор туһунан былырыын РФ Бырабыыталыстыбатын бэрэссэдээтэлин солбуйааччы — Уһук Илиҥҥи федеральнай уокурукка Бэрэсидьиэн боломуочуйалаах бэрэстэбиитэлэ Юрий Трутнев иһитиннэрэн турар. СӨ Ил Дархан уонна Бырабыыталыстыба пресс-сулууспата иһитиннэрбитинэн, Саха сиригэр бырайыагы олоххо киллэрэргэ федеральнай бүддьүөттэн 2022 сылга көрүллүбүт үпкэ-харчыга, уопсайа 37 куоракка уонна сэлиэнньэҕэ 124 тиэргэни уонна мини-пааркалары оҥоруу үлэтэ тиһиктээхтик салҕанар. Быйыл сэтинньигэ диэри өрөспүүбүлүкэ үрдүнэн уопсайа 124 тиэргэн уонна мини-паарка тупсарыллан, саҥардыллан, ситэн-хотон үлэҕэ киириэхтээх. Итинтэн Дьокуускайга — 75, улуустарга — 49 диэн этиллэр.