Саха сирин сүрүн архитектора Ирина Алексеева Дьокуускай куоракка тиэргэннэри тупсарыыга үлэлэһэр сүрүн архитекторы уонна бэдэрээччиттэри кытары көрүстэ. Ирина Дмитриевна көрсүһүүгэ оҕо оонньуур былаһааккаларыгар туруоруллар уонна спортивнай тэриллэр хаачыстыбаларыгар болҕомтону уурарга эттэ. Киэҥ хабааннаах үлэни толорорго, тэриллэринэн хааччыйар Арассыыйа бөдөҥ, итинник үлэҕэ үөрүйэхтээх тэрилтэлэри кытары үлэлэһэллэригэр эттэ.
Кини Арассыыйа ырыынагар биллэр биэс улахан хампаанньаны кытары: КрасАтрикс, Романа, davinci, Наш двор, fk-ramps үлэлэспиттэрин, тэриллэр манна аҕалыллыбыттарын, улуустарга былаһааккалары бэлэмнииллэрин эттэ. Маны таһынан, тиэргэннэр манна олорор дьон ирдэбиллэригэр эппиэттэһэр буолуохтаахтарын бэлиэтээтэ.
—Бэлиэтэммитинэн, дьон ордук былаһаакканы, массыыналар турар сирдэрин аспаал-бөтүөн бүрүөһүннүүргэ туруорсубуттар. Биһиги барытын учуоттуурга кыһанабыт. Холобур, тырааныспардаах эрэ дьон санаатын истэр, ылынар тутах. Элбэх оҕо оонньууругар, кырдьаҕастар сынньаналларыгар эмиэ табыгастаах буолуохтаах, — диир өрөспүүбүлүкэ сүрүн архитектора.
Сорох улуустар баһылыктара тупсарыллар тиэргэннэр уонна мини-паркалар олус интэриэһинэй буолалларыгар тус санааларын, этиилэрин киллэрбиттэр. Аппааныга, Дүллүкүгэ, Булгуньахтаахха уонна Нерюнгри куоратыгар быйыл fk-ramps Арассыыйаҕа оҥорон таһаарыынан дьарыктанар тэрилтэттэн улахана суох скейт-пааркалар баар буолуохтара. Манна даҕатан эттэххэ, бу хампаанньа өрөспүүбүлүкэни скейт-паарканан хааччыйар. Холобур, биир итинник холобуру Покровскайга көрүөххэ сөп.
Санатан эттэххэ, Дьокуускайга быйыл 75 тиэргэн тупсарыллыахтаах. Үлэ үс бырагырааманан ыытыллар: «Уһук Илиҥҥэ 1000 тиэргэн» бырагырааманан, «Мин тиэргэним» өрөспүүбүлүкэтээҕи бырагырааманан уонна муниципальнай — «Үс сыл устата тупсаран оҥоруу». Үс бырагырааманан үбүлээһин уопсай суумата 669 мөл. солк.
Тиэргэннэри тупсаран оҥорууга аһаҕас куонкуруһунан уонна аукционунан «Сахакапитал», «Кинг-95», «Основа» ХЭУо, ону сэргэ, бырайыактыыр тэрилтэлэр «Ростройпроект», «Газстройпроект», ИП «Атласов В.Г.», бырайыактыыр бюро «Старт» кытталлар.
Үлэлэр быйыл алтынньы бүтэһик күнүгэр диэри түмүктэниэхтээхтэр. Оттон Дьокуускай төрөөбүт күнүгэр, элбэх кыбартыыралаах 15 дьиэҕэ үлэлэр туттарыллыахтаахтар.
—Үлэ билигин 56 тиэргэҥҥэ ыытылла турар. Тротуардар, оҕолор оонньуур сирдэрэ, спортивнай былаһааккалар, кэлэр-барар суолу сороҕун ааспааллааһын үлэлэрэ толоруллаллар. Маныаха урукку бүрүөһүннэри көтүрэн, төҥүргэстэри хостоон, о.д.а. кэккэ үлэлэри бүтэрдилэр, — диэн «Главстройтан» иһитиннэрэллэр.
+1
+1
+1
+1
+1
+1
+1