«Уһук Илиҥҥэ 1000 тиэргэн» -– бырайыак бары түһүмэҕэр кыттыы улахан суолталаах
Саха сиригэр «Уһук Илиҥҥэ 1000 тиэргэн» бырагырааманан тиэргэннэри уонна дьоҕус пааркалары бырайыактааһын олунньу 7 күнүгэр диэри салҕанар. Бырайыактааһын үлэтигэр олохтоохтор көхтөөхтүк кытталлар.
edersaas.ru
Билигин эпидемиология балаһыанньатын учуоттаан, бырайыагы видео-кэмпириэнсийэ көмөтүнэн дьүүллэһэллэр.
«Олохтоохтор бырагырааманы олоххо киллэрии бары түһүмэҕэр кытталлара улахан суолталаах. Ол өрөспүүбүлүкэ куораттарыгар, бөһүөлэктэригэр уонна сэлиэнньэлэригэр тиэргэннэр уонна дьоҕус пааркалар бары өттүнэн тупсаҕай уонна табыгастаах буолалларыгар көмөлөһүө», -– диэтэ СӨ Ил Дархана Айсен Николаев урут бэлиэтээн эппитэ.
Кыттааччылар массыына туруорар сирдэр тиийбэттэрин, күөх олордуу суоҕун, оҕо былаһааккаларын туругун, ааһар суоллары өрөмүөннээһин, сатыы сылдьар киһи суолун оҥоруу, кытаанах бөҕү-саҕы араарарга анал зоналары оҥоруу боппуруостарын дьүүллэһэллэр. Олохтоохтор дьүүллэһии түһүмэхтэригэр көннөрүүлэри киллэрэллэрэ бырайыактар көдьүүстэрин уонна хаачыстыбаларын үрдэтиэҕэ.
Манна даҕатан эттэххэ, «Уһук Илиҥҥэ 1000 тиэргэн» бырагырааманы олоххо киллэрэргэ Саха сиригэр 1,5 миллиартан тахса солкуобайдаах үп көрүллүөҕэ. Ити үбүнэн 37 муниципальнай тэриллиигэ 124 тиэргэн уонна дьоҕус паарка тупсарыллыаҕа.
Надежда ЕГОРОВА, «Саха сирэ» хаһыат, edersaas.ru