Дьокуускай куоракка «Уһук Илиҥҥэ 1000 тиэргэн» федеральнай бырагыраама олоххо киириитэ урутаан киирэн иһэр.
Балаҕан ыйыгар диэри Саха сирин киинигэр 75 эбийиэги тупсарары былаанныыллар. Крупская 21 №-гэр баар биир эбийиэги Ил Дархан Айсен Николаев бэрэбиэркэлээтэ.
«Бу улахан тэрээһиннэртэн биирдэстэрин биһиги РФ бэрэсидьиэнин Уһук Илиҥҥи федеральнай уокурукка боломуочуйалааҕа Юрий Петрович Трутнев өйөбүлүнэн олоххо киллэрэбит. Бары тэрээһиннэр хаачыстыбалаахтык уонна кэмигэр толоруллаллар. Ону сэргэ, мин куорат салалтатыттан боппуруоһу кэлимник, киэҥник хабан быһааралларыгар, тиэргэни өрөмүөннүүллэрин сэргэ, аттыгар баар сири-уоту, дьиэ таһын эмиэ болҕомтоҕо ылалларыгар көрдөспүтүм«, — диэн этэр Айсен Николаев.
Билиҥҥи кэмҥэ бары тиэргэннэргэ үлэ ыытылларыгар хантараактар түһэрсиллибиттэр уонна өрө тардыы, тупсарыы саҕаламмыт: матырыйааллар аҕалыллыбыттар, былааннааһын, суол хаймыыларын уонна тротуар билиитэлэрин оҥоруу, о.д.а. үлэлэр ыытыллаллар. Атырдьах ыйыгар диэри оҕолор оонньуул уонна успуордунан дьарыктанар былаһааккаларга тэриллэр туруоруллаллар.
Бары бырайыактарга эрэгийиэн күнүн-дьылын уратыта учуоттанар. Куоракка уопсайа 75 территория оҥоһуллар. Быйыл сэтинньигэ диэри куораттарынан уонна сэлиэнньэлэринэн уопсайа 124 тиэргэн тупсарыллыахтаах. Санатан эттэххэ, Уһук Илин нэһилиэнньэлээх пууннарыгар тыһыынчанан тиэргэни тупсаран оҥоруу туһунан былырыын балаҕан ыйыгар РФ бэрэсидьиэнин Уһук Илиҥҥи федеральнай уокурукка боломуочуйалааҕа Юрий Трутнев иһитиннэрэн турар. Бырагыраама иитинэн Уһук Илин бары эрэгийиэннэрэ тиэргэннэри тупсаран оҥорууга федеральнай бүддьүөттэн үп ылбыттара.
Хаартыскаҕа Андрей Сорокин (СИА) түһэриитэ