Үрүҥ Хайа олохтооҕо Розалия Туприна балыыһаҕа санитарканан үлэлиир. Кини дьикти дьарыктаах: мыыла эгэлгэтин хомуйар, аҥаардас кураанах суутун эрэ буолбакка, бүтүннүү хаһаанар. “Мыыла мыылаттан сытынан уратылаһар”, — диир Розалия Иннокентьевна.
Кини ааспыт үйэ 80-с сылларыгар хомуйа сылдьан баран, бырахпыт. Бука, ас-таҥас, мал-сап тиийбэт кыһалҕата ыктаҕа буолуо. Ол кэнниттэн икки сыллааҕыта дьарыгын саҥаттан сөргүппүт. Саҥа саҕалаабыт уонна киин сиртэн ыраах олорор киһи диэтэххэ, бэлиэр, ыраатыннарбыт. Онно-манна айанныыр дьоҥҥо уонна оҕолоругар үлэһэн, ыллартарар. Мыыла кыыл-сүөл сыатыттан эрэ оҥоһуллар буолбатах. Тимир мыыла кытта баар буолар эбит.
Розалия Иннокентьевна Сунтаар Бордоҥуттан төрүттээх. Кэргэнэ Владимир Ануфриевич култуура эйгэтигэр сыһыаннаах буолан, сааһын тухары кулуупка үлэлиир. Розалия уонна Владимир Туприннар 4 оҕолоохтор, 9 сиэннээхтэр. Кинилэр ийэлэригэр, эбэлэригэр хайаан даҕаны мыыла кэһиилээх кэлэллэр. Мыыла минньигэс сыта муннугун саба охсон, дьиэ иһин тунуйара оҕо сааһы санатарга, бырааһынньык тыынын биэрэргэ дылы.
Василий НИКИФОРОВ, «Саха сирэ» хаһыат, edersaas.ru
Мария ВАСИЛЬЕВА (СИА) хаартыскаҕа түһэриитэ.