Сунтаар улууһун 4 уһуйааныгар ааспыт сыл сэтинньититтэн туус хосторо оҥоһуллубуттара. Бу хостор олохтоох Кэмпэндээйи тууһуттан оҥоһуллан, оҕолор доруобуйаларын бөҕөргөтөргө туһалыыллар. Айылҕа биэрэр ыраас тууһа муора тууһуттан итэҕэһэ суох, тыынар уорганнарга үчүгэйдик дьайар.
Билиҥҥи араас инфекция тарҕаммыт кэмигэр туус хосторо элбииллэрэ буоллар, киэҥ араҥаҕа туһалыах этилэр. Бу туһунан вице-премьер Михаил Никифоров ыыппыт мунньаҕар кэпсэттилэр. Манна Сунтаар улууһун уопутун киэҥник тарҕатыахха сөп диэн этии киирдэ.
Биллэрин курдук, сайын муораҕа баран сынньаммыт оҕо кыһынын үгүстүк ыалдьыбат. Ыал эрэ барыта муораҕа барар кыаҕа суох. Маннык туус хосторо хас уһуйаан аайы бааллара буоллар, оҕолор доруобуйалара биллэ бөҕөргүө этэ. Бу бырайыак олус ыарахан суох эрээри, оҕо доруобуйатыгар туһата улахан.
Бу бырайыагы Сунтаар улууһун дьаһалтата үөрэх министиэристибэтин уонна Кэмпэндээйитээҕи туус хампаанньатын кытары бииргэ үлэлэтэллэр. Михаил Никифоров уонна урбаан, атыы-эргиэн, туризм министиэристибэтэ куратор быһыытынан сүрүннүүллэр.
Сунтаар улууһун уһуйааннарын сэргэ, Бүлүү куоратыгар “Алмазик” уһуйааҥҥа туус хоһо оҥоһуллан эрэр. Аны Өлөөҥҥө уонна Анаабырга алта хоһу оҥорор былааннаахтар.
Биир хос сыаната – 800-1200 тыһыынча солкуобай, улуус төһө ырааҕыттан, таһыы-тиэйии сыанатыттан тутулуктаах. Грант харчытын эмиэ туһаныахха сөп. Хос эркинин, үрдүн, муостатын бүтүннүү Кэмпэндээйи тууһунан бүрүйэллэр.
Манна даҕатан эттэххэ, Кэмпэндээйи тууһа күөмэйи сайҕанарга эмиэ олус туһалаах. Ону тэҥэ, былырыыҥҥыттан ыла киһи сиир бытархай тууһун оҥорон, тупсаҕай хаалаан-суулаан, атыыга таһаарбыттара.
Ангелина Васильева, “Саха сирэ” хаһыат, edersaas.ru