СӨ Бырабыыталыстыбата, Дьокуускай куорат дьаһалтата уонна “ВИС” тэрилтэ бииргэ үлэлэһиигэ дуогабар түһэрсэн, аҕыйах сылтан бэттэх үгүс оскуола, уһуйаан тутуллан үлэҕэ киирдэ. Олортон биирдэстэринэн куорат 203-с түөлбэтигэр 2018 сыл ахсынньытыгар үөрүүлээх быһыыга-майгыга аһыллыбыт “Цветик-семицветик” уһуйаан буолар.
Уһуйаан судаарыстыбаннай-чааһынай бииргэ үлэлэһии бырагырааматынан тутуллубута. 4 119 кв. миэтэрэ иэннээх, 315 миэстэҕэ суоттаммыт кыһа аныгы ирдэбилгэ барытыгар эппиэттиир. Ол курдук, бассейннаах, физкултууралыыр уонна муусукаҕа уһуйар киэҥ-куоҥ саалалардаах.
Элбэх оҕолоох ийэ Татьяна Поскачина: “Оҕобут “Цветик-семицветик” аһыллыаҕыттан, бастакы күнүттэн сылдьар. Бу аныгы, тупсаҕай, кэрэ көстүүлээх уһуйаан. Оҕо сайдарыгар усулуобуйа барыта олохтоммут. Хореография, акробатика, балет, фольклор, хомус, бассейн, футбол куруһуоктара бааллар. Ону таһынан, оҕо баҕатынан төлөбүрдээх өҥөлөргө эмиэ сурутуохха сөп. Биһиги бөлөхпүт нууччалыы тыллаах. Иитээччилэрбит олус эйэҕэстэр. Күн ахсын араас дьарыктары ыыталлар, үөрэтэллэр, сайыннараллар. Оҕобүт уһуйааныгар үөрүүнэн барар, дьүөгэлэрдээх.
Уопсайынан, 203-с түөлбэ олорорго бары өттүнэн табыгастаах. Барыта биэс-алта судаарыстыбаннай, чааһынай уһуйаан баар. Инфраструктурата сайда турар. Чөкө, ханна даҕаны ыраах барар ирдэммэт, оннооҕор “Мин докумуонум” судаарыстыбаннай өҥө тэрилтэтэ кытта, барыта — түөлбэбит иһигэр баар”, — диэн санаатын үллэстэр.
Санатан эттэххэ, “ВИС” бөлөх үлэлээбит сылларын тухары Арассыыйа уонна Европа 22 куоратыгар бөдөҥ эбийиэктэри тутутаалабытынан биллэр. Күн бүгүн Москва, Новосибирскай уобаластарыгар, Хабаровскай кыраайга, Саха сиригэр, Юграҕа уонна Ямалга бырайыактардаах. Саха сиригэр кэлиҥҥи үс сыл иһигэр 12 социальнай суолталаах эбийиэги тутан үлэҕэ киллэрдэ.
Людмила ПОПОВА, “Саха сирэ” хаһыат, edersaas.ru
Хаартыска: СИА