Өрөспүүбүлүкэ ыарыыны эмтиир-сэрэтэр тэрилтэлэрэ нэһилиэнньэ гириип, ОРВИ уо.д.а. сыстыганнаах ыарыылартан эмсэҕэлээбэтин туһугар араас өрүттээх үлэлэри ыыталлар.
edersaas.ru
Чуолаан, СӨ Роспотребнадзор управлениета дьаҥы сэрэтии биир саамай туһалаах көрүҥүнэн нэһилиэнньэҕэ былааннаах быһыыны биэрии буоларын тоһоҕолоон бэлиэтиир.
2019 сыл тохсунньу 18 күнүнээҕи туругунан, ыарыыны сэрэтэр быһыылары өрөспүүбүлүкэ 444568 олохтооҕо ылла (нэһилиэнньэ 46%).
Санатан эттэххэ, быһыыны биэрии хампаанньата түмүктэннэ.
Медицинскэй тэрилтэлэр уонна аптыакалар ситимнэрэ вируһу утары охсуһар препараттары, сириэстибэлэри уонна биирдиилээн киһи харыстанар сириэстибэлэрин (мааскалары, бэрчээккэлэри) эрдэттэн хаһааналлар.
Доруобуйа харыстабылын уонна үөрэхтээһин үлэһиттэригэр үөрэтэр семинардар ыытыллаллар.
Уһуйааннарга уонна оскуолаларга төһө оҕо сылдьарын, ыалдьарын билээри, Роспотребнадзор управлениета үөрэх тэрилтэлэрин кытары күн аайы мониторинг ыытар.
Ыарыы нуорманы таһынан бардаҕына, оскуолаларга үөрэх тохтотуллар.
Салгыны ыраастыыр тэрили буларга эбии үп көрдөнөр. Уһуйааннар оҕолоругар “сарсыардааҥы ыраастаныы” («утренний фильтр») ыытыллар.
Сыстыганнаах ыарыылар (гириип, ОРВИ) өрө турар түбэлтэлэригэр, эмтиир тэрилтэлэргэ эбии куойкалар, орто сүһүөх медицинскэй үлэһиттэр уонна быраастар ахсааннарын элбэтэр туһунан былаан оҥоһуллар.
Гириип өрө туруутун СӨ Роспотребнадзор управлениета хонтуруоллуур.
Надежда ЕГОРОВА, «Саха сирэ» хаһыат, edersaas.ru