Ньурба улууһун борокуратууратыгар иһитиннэрии киирбит — Антоновка сэлиэнньэтигэр баар «Ромашка» уһуйааныгар биир оҕо эт-хаан эчэйиитин ылбытын туһунан. Борокуратуура бу чахчынан бэрэбиэркэ ыыппыт.
Бэрэбиэркэ быһаарбытынан, бу дьыл тохсунньу ыйын бүтүүтүгэр уһуйаан 5 саастаах иитиллээччитэ оонньуу сылдьан охтон, мэйиитэ доргуйбут, төбөтүгэр, кэтэҕэр ыарахан эчэйиилэри ылбыт. Маныаха оҕо иитээччи аттыларыгар суох кэмигэр охтубут.
Борокуратуура бэрэбиэркэ матырыйаалларын силиэстийэ уорганнарыгар ыыппытын түмүгэр, РФ Холуобунай кодексатын 118-с ыст. 2-с чааһынан, ол эбэтэр, идэтинэн эбээһинэстэрин сөбө суохтук толорон, сэрэҕэ суохтан оҕо доруобуйатыгар ыарахан эмсэҕэлээһини оҥоруу бэлиэтэ баарынан, холуобунай дьыала тэриллибит.
Дьыала улуус борокуратууратын хонтуруолугар сылдьар.
Оҕо балыыһаҕа эмтэнэн, билигин доруобуйатын туруга этэҥҥэ. Балыыһаттан тахсан, салгыы дьиэтигэр эмтэнэр.
Бу туһунан СӨ Борокуратууратын пресс-сулууспата иһитиннэрдэ.
Санатар буоллахха, бу дьыл тохсунньу 18 күнүгэр Нам улууһугар икки кыра оҕо «Туллукчаан» уһуйаантан бэйэлэрэ тахсан барбыт чахчыларынан (биир кыыс тарбахтарын үлүппүтэ) холуобунай дьыала тэриллэн силиэстийэлэнэр, уһуйаан сэбиэдиссэйин уонна иитээччитин үлэлэриттэн уһулбуттара. Эбээһинэстэрин толорууга дьалаҕайдык сыһыаннаспыттарын иһин.
Биһиги корр., «Саха сирэ» хаһыат, edersaas.ru
Хаартыска: интэриниэттэн