Уһаайбаларыгар борохуот ааллаах ыал

Ааптар: 
Бөлөххө киир:

Нам улууһун Түбэ нэһилиэгэр командировкаҕа сылдьан, суруналыыс киһи быһыытынан олохтоохтортон: «Киһини кэрэхсэтэр туохтааххытый?» — диэн ыйыппыппар, үгүс киһи: «Ыал бэйэтин уһаайбатыгар оҕо былаһааккатын оҥорбута баар. Өссө гирляндаларын киэһэ уматтахтарына, былаһаакка барыта уотунан күлүмүрдүү олорор»,— диэн кэпсээбитэ.

Мин ол туох былаһаакканы кэпсииллэр диэн интэриэһиргээн, эппит ыалларыгар анаан ыйдаран тиийбитим. Дьиэлээх хаһаайка Лена Максимова: «Тупсарыы сылыгар биһиги эмиэ нэһилиэкпит ис көстүүтүн тупсаран, киэргэтэн биэрэргэ санаммыппыт. Мин туох ханна туруохтааҕын уруһуйдаан, мас ууһа Николай Павловка сакаастаан, сиэммэр былаһаакка оҥотторбутум«, — диэн кэпсээтэ.

Былаһаакка дьиэ хаһаайкатын 1,5 саастаах сиэнигэр Влада Мохначевскаяҕа анаммыт эбит. Быйыл саас кулун тутарга тутуу маһын бэлэмнээбиттэр уонна сайыны быһа тутан, атырдьах ыйын бүтүүтүгэр дьиэ хаһаайката сыырын, борохуотун кырааскалаан, үлэҕэ киллэрбит. Кырачаан Влада дьонун кытта улуус киинигэр олорор эбит. Онон кини хаһан улаатан, бу былаһааккаҕа оонньуор диэри, былаһаакка чугастааҕы ыаллар оҕолоро, сиэннэрэ кэлэн оонньуур сирдэринэн буолбут.

Манна оонньуу кэлэр оҕолор: «Биһиэхэ эмиэ тетя Леналаах курдук сыыр уонна борохуот наада», — дииллэр үһү. Онон үгүс ыал уһаайбатыгар оҕо оонньуур былаһааккатын туттар былааннаах. Уопсайынан, бу тутуубутун дьон олус сэргээтэ. Суол аартыга буолан, оннооҕор Кэбээйилээн иһэр дьон киирэн ыйыталаһан, сүбэлэтэн ааһаллар. Быйыл Тупсарыы сылын биллэрэн, хас биирдии ыал тиэргэнин оҥосторго дьулуһуутун көҕүлээтибит. Кэнэҕэс нэһилиэкпит ыалларын уһаайбалара бары маннык тиэргэннэрин киэргэттэхтэринэ, нэһилиэкпит көстүүтэ биллэ тупсуо этэ буоллаҕа, — диэн санаатын үллэстэр Түбэ нэһилиэгин олохтооҕо Лена Максимова.

Елена ПОТОЦКАЯ.

+1
0
+1
0
+1
0
+1
0
+1
0
+1
0
+1
0