Өрөспүүбүлүкэ улуустарын кииннэрин уонна нэһилиэктэрин сайдыытыгар туһуламмыт тупсарыы үлэтэ былааннаахтык ыытыллар.
edersaas.ru
Соторутааҕыта Өймөкөөн улууһун баһылыга Иннокентий Сивцев өрөспүүбүлүкэ кылаабынай архитекторын, архитектура уонна тутуу бэлиитикэтин ыытар өрөспүүбүлүкэтээҕи управление салайааччыта Ирина Алексееваны кытта көрсөн кэскиллээх тосхолу торумнаата.
Өрүттэр улуус киинэ Уус Ньара уонна араас улахан тэрээһиннэр ыытыллар киннэринэн буолбут Томтор нэһилиэгин архитектурнай тупсарыытыгар сыһыаннаах боппуруостары ырыттылар.
— 2023 сылга Өймөкөөн улууһун Томтор нэһилиэгэр өрөспүүбүлүкэтээҕи Олоҥхо Ыһыаҕа ыытыллыахтаах. Онон сибээстээн, Томтор архитектурнай ирдэбилгэ эппиэттээбэтинэн, нэһилиэк генеральнай былааныгар уларытыы киллэриллиэҕэ. Маны таһынан, улуус киинигэр Уус Ньараҕа «Доҕордоһуу аллеята» искибиэр тутуллуоҕа.
Бырайыак ааптара — СӨ Куорат эйгэтин тупсарыы боппуруостарыгар «LETO» киинин эдэр архитектора Николай Степанов.
Бу бырайыагы олоххо киллэриигэ, улуус олохтоохторун уонна уопсастыбаннай тэрилтэлэр киллэрбит этиилэрэ уонна санаалара учуоттаныаҕа, — диэн санаатын үллэһиннэ улуус баһылыга Иннокентий Сивцев.
Елена ПОТОЦКАЯ, «Саха сирэ» хаһыат, edersaas.ru