Бу ынырык быһылаан былырыын сайын Муома улууһун Хонуу сэлиэнньэтигэр буолбута. Дьыала суукка көрүллэн, бириигэбэр тахсыбытын туһунан СӨ Борокуратууратын пресс-сулууспата иһитиннэрдэ.
Суут быһаарбытынан, 2018 сыл от ыйын саҥатыгар бу киһи бииргэ арыгылыы олорон кыыһырсан, убаҕас уматыктаах пластиковай бытыылканы ылан, утары олорор киһитин ол уматыгынан ыһан-кутан баран, испиискэни уматан үрдүгэр быраҕан кэбиспит.
Маныаха уоттаабыт киһитэ бэйэтин кыаммат ыарахан ыарыһах буоларын билэ-билэ, мас дьиэ кыбартыырата, манна олорор атын дьон уокка былдьаныахтарын сөбүн билэ-билэ, маннык ынырык буруйу оҥорбут.
Бу дьиикэйдик быһыыламмытын түмүгэр, эмсэҕэлээччи эрэйдээх этин-сиинин 46%-нын уокка сиэттэрэн, сотору кэминэн өлөөхтөөбүт.
Суут мунньаҕар судаарыстыба аатыттан буруйдааһыны билигин өрөспүүбүлүкэ борокуруорун эбээһинэһин толорооччу Айдар Иванов бэйэтэ оҥорбут.
Суут сууттанааччыны бэйэтин көмүскэнэр кыаҕа суох киһини ураты кырыктаахтык, атын дьоҥҥо кутталлаах ньыманан соруйан өлөрүүгэ буруйдааҕынан билинэн, 16 сылга кытаанах эрэсиимнээх холуонньаҕа көҥүлүн быһарга уурбут.
Бириигэбэр сокуоннай күүһүгэр киирэ илик, өрүттэр ааһыныахтарын сөп.
Биһиги корр., «Саха сирэ» хаһыат, edersaas.ru
Хаартыска: интэриниэттэн.