Тыыллымалар бастыҥнарын чиэстээтилэр

Бөлөххө киир:

Самаан сайыммыт үгэнэ. Күн уота. Куйаас. Ардах. Тыал. От суугунуур. Сир аһа ситэр. Айылҕабыт барахсан кыаҕын барытын көрдөрөр. Бу курдук, олох бэйэтин хаамыытынан баран иһэр. Маннык күннэргэ ураты түгэннэри өйдөөн хаалыаххын баҕараҕыҥ…

От ыйын саҥатыгар, бэрт итии-куйаас эрээри, хантан эрэ, арааһа, Эбэ диэкиттэн кэлэн, дөрүн-дөрүн бэркэ диэн сөрүүкэтэн ааһар сиккиэр тыаллаах күн, Мэҥэ Хаҥалас улууһун Хаатылыма сиригэр Тыыллыма нэһилиэгин 200 сылыгар, Саха АССР тэриллибитэ 100 сылыгар аналлаах үбүлүөйдээх, үс нэһилиэк – Лоомтука, Хаатылыма уонна Ороссолуода  холбоһуктаах ыһыахтара буолан ааста.

Сахалыы сиэр-туом тутуһуллан, “Төрүт-Уус Дойдубут Тыыллыма” ыһыах алгыһынан саҕаланна. Көөнньөр кымыһынан айах тутуу, саламааттаах сандалы, Омоҕойтон утумнаах оһуохайбыт, тойукпут, Кэрэ Куону көрүү, күүстээх, сымса боотурдар күөн-күрэстэрэ, “Күн дьөһөгөй” — ат сүүрдүүтэ, ылбаҕай ырыа, үҥкүү – барыта манна баар буолла!

Үбүлүөйдээх ыһыах ыалдьыттарын улуус аатыттан Семен Семенович Потапов, нэһилиэктэр баһылыктара Константин Васильевич Лепчиков, Айсен Русланович Спиридонов, Илья Валентинович Макаров эҕэрдэлээтилэр.

Бу кэрэ-бэлиэ күн, бастатан туран,  күөгэйэр күннэригэр үлэни өрө туппут производство бастыҥнарын, чулуу уопсастыбанньыктары, олох-дьаһах, үөрэхтээһин, култуура эйгэтигэр өр сыл үлэлээбит дьону чиэстээтилэр, Махтал суруктары, өйдөбүнньүк сувенирдары туттардылар. Ол курдук, холобур, II Тыыллыма нэһилиэгин бочуоттаах олохтооҕун аата ОДьКХ тырахтарыыһынан өр сыл эҥкилэ суох үлэлээбит Василий Васильевич Лукиҥҥа, оскуола-сад дириэктэрэ Валентина Николаевна Дмитриеваҕа иҥэрилиннэ. Бааһынай хаһаайыстыба салайааччыта Александра Семеновна Игнатьева “Саха АССР 100 сыла” үбүлүөйдээх бэлиэнэн наҕараадаланна,  Мэҥэ Хаҥалас улууһун баһылыгын грамотата Роман Романович Степановка, Полина Николаевна Ксенофонтоваҕа, Екатерина Николаевна Игнатьеваҕа  туттарылынна. Оттон  Дьоруой ийэ Варвара Романовна Афанасьева итиэннэ Гаврил Васильевич Спиридонов “Саха АССР 100 сыла” үбүлүөйдээх бэлиэнэн наҕараадаланнылар. Үгүс киһи интэриэһин тарпыт күөн-күрэстэр кыайыылаахтарынан таҕыстылар: “Тыыллыма Кэрэ Куота” – Сардаана Трофимова, “Тыыллыма боотура” – Петр Сергеев (иккиэн  Ороссолуодалар).

Айыы балаҕанын тутууга акция биллэриллибитэ. Манна, Хаатылыма ытыктыыр киһитэ, өр кэмҥэ “Сардаана”  фабрика Генеральнай дириэктэринэн үлэлээбит Иван Петрович Спиридонов дьоно, оҕолоро, аймахтара харчынан көмө оҥорон, мустубут дьоҥҥо холобур буоллулар.

Үбүлүөйдээх ыһыаҕы саха эстрадатын сулустара, талба талааннаах ырыаһыттар Сиэйэ Уола, Зинаида, Владислав Лукачевскайдар уо.д.а. киэргэттилэр.

Ыһыахха барыллаан ааҕыынан 300-тэн тахса ыалдьыт сырытта. “Өтөрүнэн буолбатах үчүгэй ыһыах…”, —диэн, дьон тэрийээччилэргэ махтанна.

Татьяна МАРКОВА.

+1
0
+1
0
+1
0
+1
0
+1
0
+1
0
+1
0