Уопсастыба

Тыва чөл олох холобурун көрдөрүөҕэ

Тыва дьонугар-сэргэтигэр арыгылааһын кыһалҕата муҥутуур уһукка тиийдэ. Ол да иһин, өрөспүүбүлүкэҕэ арыгылааһыны утары охсуһуу бэлиитикэтигэр үгүс үлэ ыытыллар. «Тываҕа чөл олоҕу батыһыы күүһүрдэ» диэн өрөспүүбүлүкэ баһылыга Шолбан Кара-оол эттэ. Кини бэйэтэ чөл олоҕу тутуһарын биллэрэн туран, бары таһымнаах уонна рангалаах салайааччылартан ирдэбилин күүһүртэ.

Бу күннэргэ Саха сирин чөл олоххо десанын Тываҕа үрдүк таһымнаахтык көрүстүлэр. Тываҕа Саха сирин десанын тэри­йээччи, тыа хаһаайыстыбатын миниистирин урукку солбуйааччыта, убаастанар киһи, актыбыыс Лариса Сынааевна Монгуш, өрөспүүбүлүкэ үлэҕэ миниистирэ Елена Ондаровна Саая, «үрүҥ көмүс волонтердар», «Норуот уолаттара – чөл олох иһин» хамсааһын – дьиҥнээх патриоттарынан буолаллар. Көрсүһүүлэргэ, тэрээһиннэргэ чөл олоҕу куттал суох буолуутугар, дойдулара чэчирии сайдарыгар бигэ төрүөт буоларын өйдөөн туран, эттидэр-тыыннылар.

Тыва доруобуйатын харыстабылын миниистирин солбу­йааччы Кудэр Монгушка, бары баһылыктарга, кинилэр солбу­йааччыларыгар уонна кожуун (муниципальнай тэриллии) олохтоохторугар тылынан уонна дьыаланан өйөбүллэригэр махтанабыт.

Кожууннарга учууталлары, салайааччылары уонна нэһилиэнньэни кытары үлэ, ытык сирдэргэ сылдьыы, өрөспүүбүлүкэ бэрэссэдээтэлин солбуйааччы Анатолий Партизанович Дамбааҕа-Хураакка ыытыллыбыт мунньах, «Тыва – чөл олох уонна олох доруобай уобараһын сирэ-­уота» форумҥа кыттыы – бу барыта биһиэхэ күүстээх санааны сахта. Биһиги эрэгийиэннэр икки ардыларыгар хардарыта бииргэ үлэлээһиҥҥэ тугунан да сыаналаммат үөрү­йэҕи ыллыбыт. Тывалар – олус түмсүүлээх уонна мындыр норуот. Тыва сотору кэминэн чөл уонна доруобай олох холобурун көрдөрүөҕэ. Саха Өрөспүүбүлүкэтигэр саҕаламмыт чөл олох хамсааһына инникитин даҕаны Арассыыйа бары эрэгийиэннэригэр өйөбүлү ылыаҕа.

Матвей ЛЫТКИН, «Саха сирэ» хаһыат, edersaas.ru

3
0
Telegram Whatsapp

Добавить комментарий