СƟ Бырабыыталыстыбатын Бэрэссэдээтэлин бастакы солбуйааччыта Дмитрий Садовников бэс ыйын 15 күнүгэр ойууру баһаартан харыстыырга анаан тэриллибит суһал ыстаап сүбэ мунньаҕын тэрийэн ыытта.
Экология, айылҕаны туһаныы уонна ойуур хаһаайыстыбатын министирин солбуйааччы Алексей Агеев биэрбит чахчыларынан, бүгүн, сарсыарда 08.00 чааска, өрөспүүбүлүкэҕэ уопсайа 24 709,0 га иэннээх 9 ойуур баһаарын умулларыыга үлэ ыытыллар. Ол курдук баһаардар Уус Маайа, Өймөкөөн, Томпо, Ньурба, Сунтаар, Үөһээ Бүлүү, Мэҥэ Хаҥалас, Хаҥалас, Мииринэй улуустарыгар бааллар. Уопсайа 6 317,0 га иэннээх үс баһаар Хаҥалас, Мииринэй, Сунтаар улуустарыгар бохсулунна. Баһаары утары охсуһууга 1031 киһи уонна 112 техника үлэлиир.
Айылҕа харыстабылын Дьокуускайдааҕы авиационнай базатын салайааччыта Владимир Леонов бүгүн Мииринэйгэ Тюмень куораттан өссө 100 федеральнай саппаас үлэһиттэрэ кэлбиттэрин туһунан иһитиннэрдэ. Бу Абаканнааҕы айылҕа харыстабылын авиационнай этэрээтин үлэһиттэрэ. Мантан 50 киһи Сунтаар улууһугар 7 №- дээх ойуур баһаарын умуруорууга атаарылыннылар, атыттара Үөһээ Бүлүү улууһугар ойуур баһаарын умуруорууга айанныахтара.
Дмитрий Дмитриевич мунньах кэмигэр Ил Дархан ойуур баһаардарын утары үлэҕэ анаан алта Ан-2 сөмөлүөтү атыылаһарга дьаһал биэрбитин туһунан иһитиннэрдэ. Манан сибээстээн вице-премьер Тырааныспар министиэристибэтин улуустарга сөмөлүөт түһэр кыахтаах былаһааккалар төһө бэлэмнэрин туһунан оччуоттары бэлэмнииригэр сорудахтаата.
Мунньах кэмигэр сорох улуустарга куйаас өссө күүһүрэрэ билгэлэнэрин туһунан этилиннэ. Ол аата баһаар үөскүүр куттала IV кылааска тиийэ үрдүөн сөп. Нэһилиэнньэҕэ уоту сэрэхтээхтик туһаныы быраабылаларын өйдөтүү үлэтин күүһүрдэргэ уураахтанна.
«Саха сирэ» хаһыат, edersaas.ru
Хаартыска sakha.gov.ru