Уопсастыба

Тырааныспар инфраструктуратын сайыннарыыны дьүүллэстилэр

Айсен Николаев уонна РФ тырааныспарка миниистирэ Евгений Дитрих өрөспүүбүлүкэҕэ тырааныспар инфраструктуратын сайыннарыыны дьүүллэстилэр.

edersaas.ru

Саха сирин баһылыга Айсен Николаев уонна Арассыыйа Федерациятын тырааныспарка миниистирэ Евгений Дитрих эрэгийиэн тырааныспарынан сырыытын хааччыйыыны дьүүллэспит оробуочай көрсүһүүнү ыыттылар.
Чуолаан, А-331 федеральнай массыына суолун туһаайыытын уларытар туһунан дьүүллэстилэр. Өрөспүүбүлүкэ баһылыга Мииринэй – Ленскэй – Витим – Непа – Верхнемарково туһаа­йыынан “Бүлүү” массыына суолун тутуу тыраассатын “соҕурууҥҥу” барылын туһунан этии киллэрдэ. “Соҕурууҥҥу барыл” өрөспүүбүлүкэ уонтан тахса нэһилиэнньэлээх пуунун хабан, муҥутуурдук хааччы­йыаҕа. Сирдэри-уоттары сайыннарыы социальнай-экэнэмиичэскэй өттүттэн көрдөххө, бу маршруту уларытыы туһатыгар дьоһун холобур буоларын эрэгийиэн баһылыга бэлиэтээтэ.
Саха сиригэр, Уһук Илин бүттүүнүгэр эмиэ тырааныспар комплексын сайдыытын сүрүн соруктарыттан биирдэстэринэн туһаайыы (маршрут) тиһигин оҥоруу уонна кэҥэтии буолар, ити түмүгэр авиациянан сырыы куттала суох уонна тиксимтиэ буолуоҕа, магистральнай хайысхаларынан дойду киин эрэгийиэннэрин кытта сибээстээх буолуохпут. Манан сибээстээн, Уһук Илиҥҥи авиация альянсын тэрийии боппуруоһа олус сытыытык турар. Саха сирин авиахампаанньалара альянска киирэргэ бэлэмнэр уонна дойдуга оҥоһуллар массыыналары туһаныыга уопуттаахтарын учуоттаан, Уһук Илиҥҥэ тирэх буолуохтарын сөп, диэтэ Айсен Николаев.
Дьүүллэһиигэ өссө биир сүрүн тиэмэнэн “Куттала суох уонна хаачыстыбалаах массыына суоллара” национальнай бырайыагы Саха сирин сиригэр-уотугар киллэрии, ону тэҥэ муосталары өрөмүөннээһин уонна саҥардыы боппу­руостара буоллулар.

edersaas.ru

 

0
0

Добавить комментарий