Синемацентр ойоҕоһугар «Истиэнэ суулуннаҕына, аан дойду эстэр» диэн суруктаах Голливуд киинэтин былакаата ыйанан турар. Бу сырыыга Эмиэрикэ хорсун-хоодуот уолаттара Улуу Кытай истиэнэтигэр тиийэн, ханнык эрэ абааһылартан орто дойдуну быыһыахтаахтар. Саҥа талыллыбыт АХШ бэрэсидьиэнэ Дональд Трамп Мексика кыраныыссытагыр эмиэ итинник истиэнэ тутар.
Чокуур Гаврильев, “Саха сирэ” хаһыат, https://edersaas.ru/
Трамп эрэннэрбитин олоххо киллэрэр эрэстиин буолан биэрдэ. Ол курдук, кылгас болдьоххо да буоллар, күрүөйэхтэргэ Америка аанын сапта. Сирияттан, Ирактан, Ливияттан, Ирантан, Сомалиттан, Судантан уонна Йементэн киирэр дьоҥҥо виза бэриллэрин бопто.
Маны сэргэ, АХШ саҥа бэрэсидьиэнэ капиталистары аан дойду ырыынагыттан төттөрү дьиэлэригэр төннөрүөн баҕарар. Дуоһунаһыгар киирээт да, Транстихоокеанскай бииргэ үлэлээһин дуогабарын көтүрдэ. Барак Обама үҥэр-сүктэр дуогабарыгар былырыын 12 АТР дойдута илии баттаабыта. Ол сөбүлэһии барыта хайыта тардылынна.
Биллэн туран, аныгы үйэҕэ бэйэҥ бэйэҕэр хаатыйаланарыҥ кыаллыбата буолуо. Ол эрэн Эмиэрикэ саҥа салалтатата изоляционизм диэки бэйэтин политикатын иэҕиэх курдук. Ол иһин Трампы миграннар, глобалистар уонна улахан хампаанньалар сөбүлээбэттэр. Американецтар глобализмтан сылайан, Трампы таллахтара. Трамп ол иһин дойдутун тула истиэнэ тутар. Кини аҥардас көҥүлэ суох миграннары утары Мексика кыраныыссатын бөҕөргөппөт. Трамп олохтоох оҥорон таһаарыы өрө тахсарын, үлэ миэстэтэ элбиирин туһугар трансконтинентальнай хампаанньалары уодьуганныыр санаалаах. Тоҕо Кытайга баран тэрилтэ тэрийиэхтээхтэрий, Канзаска буолбатах диэх курдук туттар.
Трамп Эмиэрикэни аан дойдуга соҕотохтуу айаатаабыт атыыр оҕус оруолуттан таһаааран, экономикаҕа уонна политикаҕа сөптөөх миэстэтин буллара сатыаҕа. Төһө да, омос көрдөххө, бас-баттах тыллааҕын иһин, Трамп урукку көлүөнэ бизнес бэрэстэбиитэлэ. Онон хас биирдии хаамытын ааҕан-билэн, суоттанан сылдьар. Саамай сүрүнэ кини олохтоох норуот интэриэһинэн салайтарар. Улахан хампаанньалар интэриэстэринэн буолбатах. Ол иһин Владимир Путины кытта биир тылы булуо дии саныыбын.
Чокуур Гаврильев, “Саха сирэ” хаһыат, https://edersaas.ru/
Ыспыраапка
Улуу Кытай истиэнэтэ 8 тыһ.851 килэмиэтр усталаах. Былыргы былдьаһыктаах кэмнэргэ бу кириэппэс хуннартан көмүскээбитэ үһү.
Израиль 2012 с. эмиэ бэйэтин кыраныыссатыгар 703 килэмиэтирдээх олбуор оҥотторбута. Сыал-сорук террористар киирэллэрин бохсооһун.
Мексика кыраныыссатын кыйа тутуллуохтаах Эмиэрикэ истиэнэтэ 1500 тыһ. км. Туттуллар суумата 10-13 млрд долларга тэҥнэһэр.