СӨ технопааркатын резиденнэрэ инновационнай бородууктаны таһаардылар – киһи тириитин тымныыттан харыстыыр FREEZE PROTECT plus гель.
edersaas.ru
Бу туһунан СӨ инновация, цифровой сайдыы уонна коммуникация технологиятын миниистирэ Анатолий Семенов иһитиннэрдэ.
Кини этэринэн, сайынын муораҕа барарга тириибитин харыстыыр кириэмнэринэн, араас сириэстибэлэринэн туттабыт, оттон -47 кыраадыс тымныыга тириибитин тугунан да соттубаппыт, харыстаабаппыт.
— Тириибит куруук тымныынан хаарыллар. Ол иһин биһиги пааркабыт резиденнэрэ маннык туһалаах бородууктаны оҥорон таһаардылар. Киһи тириитэ хайдах тоҥор, хараарар төрүөтэ үөрэтиллэн FREEZE PROTECT plus састааба оҥоһулунна. Киһи тииритин килиэккэтигэр уу тоҥон хаалар буолан, муус кристаллара киһи тириитин эчэтэллэр, хараардаллар эбит, — диэн Анатолий Семенов бэйэтин инстаграм сирэйигэр суруйар.
Бу гели иэдэскэ, муннуга уонна кулгаах эминньэҕэр сотоллор. FREEZE PROTECT plus сириэстибэни тымныыга эрэ буолбакка, тириини уокка сиэттэххэ, бырдах ыстаттахха сотуохха сөп.
Бэлиэтээн этэр буоллахха, бу бородуукта бары бэрэбиэркэни, ЕАС декларациятын ааспыт. Киэҥ атыыга номнуо та5ыста.
Виктория Бястинова, edersaas.ru