Бүгүн ЗАГС үлэһиттэрин идэлээх брааһынньыктарын 103-c төгүлүн бэлиэтииллэр.
edersaas.ru
Өймөкөөн улууһугар ЗАГС тэрилтэтэ 1947 сыллаахха Уус-Ньараҕа тэриллибит. Бу иннинэ сэбиэт үлэһиттэрэ киһиэхэ сыһыаннаах суолталаах дьыала-куолу докумуону бэйэлэрин нэһилиэктэригэр оҥорон баран, Дьокуускайынан эргитэллэр эбит. Ол, биллэн турар, олус эрэйдээҕэ чахчы. Онон дьон төрөөбүт күнэ чуолкай биллибэт холобура үгүс.
Билигин аныгы үйэ буолан, докумуон барыта электроннай пуорманан толоруллар буолла.
— 2018 сыллаахха өрөспүүбүлүкэ ЗАГС-тын үлэһиттэрэ бары ЕГР ЗАГС (единый государственный реестр) диэн Арассыыйа нолуогун федеральнай быраагырааматыгар киирбиппит. Ол эбэтэр биһиги улууспут 1946 сылтан 2018 сыл балаҕан ыйыгар диэри архыып докумуоннарын барытын биир кэлим Арассыыйатааҕы электронннай ситимҥэ киллэрбиппит, — диэн кэпсиир Өймөкөөн улууһун ЗАГС-тын салайааччыта Авдотья Кондакова.
Бу күннэргэ өрөспүүбүлүкэҕэ бастыҥ үлэлээх Нам, Сунтаар уонна Өймөкөөн улуустара «Талбан» биэриигэ кыттыыны ыллылар. Онно Авдотья Кондакова бары улуустартан олус эппиэтинэстээх үлэни бастакынан түмүктээбитин бэлиэтээбиттэрэ.
— Биллэн турар, уустук үлэ этэ. Манна өссө сибээспит мөлтөҕүн эбэн кэбис. Ону ол диэбэккэ, нэһилиэктэр дьаһалталарын үлэһиттэрэ олох түүннэри олорон үлэлээн, ыксаллаах дьыаланы үмүрү туппуттара.
Онон биһиги улууспут бастакынан электроннай тиһиккэ архыыппытын киллэрэн, бастыҥнар ахсааннарыгар киирбиппититтэн үөрэбит, — диэн кэпсиир Авдотья Прокопьевна.
Улуустааҕы ЗАГС араас хайсхалаах тэрээһиннэри тэрийэр, өр сылларга бииргэ олорбут ыаллары чиэстиир.
Элбэх оҕолоох ыаллар бэстибээлээрин тэрийэн, эдэр ыаллары элбэх оҕолоноллоругар көҕүлүүр.
Өймөкөөн улууһугар сыл аайы интернациональнай дьиэ кэргэн ахсаана элбиир.
Өймөкөөн улууһа 100 сыллаах үбүлүөйүнэн сибээстээн, ЗАГС тэриллибит күнүгэр быйыл 77 саҥа төрөөбүт оҕоҕо улуус баһылыга Иннокентий Сивцев өйдөбүнньүк бэлэҕи туттарда.
Дьиҥэр быһа холуйан быйыл 100-тэн тахса оҕо төрөөбүт эбит да, Дьокуускай куоракка төрөөбүт буолан, төрөппүттэр докумуоннарын киин куоракка оҥотторбуттар. Онон отучча оҕо төрөөһүнэ Дьокуускай көрдөрүүтүгэр киирдэҕэ. Ити оҕолор докумуоннарын төрөөбүт улуустарыгар оҥорторбуттара буоллар, улуус 100 сылыгар бэртээхэй бэлэх буолуо эбит.
Куйаар ситиминэн сылы түмүктүүр дьиэ кэргэннэр улуустааҕы кэмпириэнсийэлэригэ ЗАГС салайааччыта Авдотья Кондакова эмиэ кыттыыны ылла.
«Быйылгы үбүлүөйдээх сылга оҕо төрөөһүнэ элбээн, төрөөбүт улууһум сарсыҥҥылааҕын туоһута. Онон итинник кэскиллээх докумуону толорууга үөрүүнэн ылсабын, — диэн санаатын үллэстэр өрөспүүбүлүкэҕэ бастыҥнар ахсааннарыгар сылдьар Өймөкөөн улууһун ЗАГС-тын салайааччыта Авдотья Кондакова.
Елена ПОТОЦКАЯ, «Саха сирэ» хаһыат, edersaas.ru