Маны аах Үөрэх уонна наука

Тымныы полюһун ытык учууталларыгар — 100 тыһыынча солкуобай бэлэх!

Бу күннэргэ Өймөкөөн улууһун Томтор нэһилиэгин Н.М. Заболоцкай-Чысхаан аатынан орто оскуола кэлэктиибэ, нууччалыы эттэххэ, “легенда” учууталларын Мария Боярованы уонна Елизавета Ашеинаны бочуоттаах сынньалаҥҥа атаарда.

Улуус дьаһалтатын баһылыга Иннокентий Сивцев Томтор нэһилиэгин ытык дьонугар иккиэннэригэр 100-түү тыһыынча солкуобайы бэлэх туттарда.

— РФ үтүөлээх учуутала, Өймөкөөн улууһун Бочуоттаах олохтооҕо Мария Боярова нуучча тылын учууталынан 51 сыл үлэлээн кэллэ. Томтор орто оскуолатыгар үлэлээбит педагогическай ыстааһа – 50 сыл.

СӨ үөрэхтээһин тиһигин бочуоттаах бэтэрээнэ, үөрэҕирии туйгуна Елизавета Ашеина үөрэҕирии эйгэтигэр 51 сыл, Томтор орто оскуолатыгар 39 сыл үлэлээн кэллэ.

Мария Поликарповната уонна Елизавета Прокопьевната суох Томтор орто оскуолатын киһи өйүгэр да оҥорон көрбөт. Бу икки учуутал оҕо иитиитигэр эрэ буолбакка, төрөөбүт Өймөкөөннөрө, тапталлаах Томтордорун уопсастыбаннай олоҕор олохторун бүс-бүтүннүү анаатылар.

Истиҥник саныыр учууталларбытыгар улуус олохтоохторун аатыттан барҕа махталбытын тиэрдэбит уонна төһө да бочуоттаах сынньалаҥҥа олордоллор, биһиэхэ барыбытыгар сүбэнэн-аманан өйөбүл буола сылдьыахтара диэн эрэнэбит, — диэн улуус баһылыга Иннокентий Сивцев санаатын тиэртэ.

РФ үтүөлээх учуутала Мария Боярова бэйэтин санаатын бу курдук үллэһиннэ:

— «Учуутал күнүгэр оскуола кэлэктиибэ бэтэрээннэрбитин ыҥырабыт» диэн биллэрбитэ. Ким да «эһигини атаарабыт» диэн эппэтэҕэ. Ол да иһин буолуо, идэлээх бырааһынньыкпыт Елизавета Прокопьевна биһиэхэ дьиҥнээх соһуччу үөрүүнү бэлэхтээтэ.

Аактабай саала ис хоһооно биһиэхэ анаан бэлэмнэммит. Кичэллэн оҥоһуллубут сценарий, улууспут Аҕа баһылыга Иннокентий Сивцев улуус кииниттэн анаан айаннаан кэлэн, истиҥ иһирэх тылларынан эҕэрдэлээн, сибэкки дьөрбөтүн туттарыыта, үөйбэтэх-түөйбэтэх өттүбүтүттэн ити үлүгэр улахан сууммалаах харчы сэртипикээтин туттарыыта – олох тылбытыттан матыахпытыгар диэри соһуйдубут, долгуйдубут, үөрдүбүт…

Биһиги өр сыллаах сэмэй үлэбитин итинник үрдүктүк сыаналаабыттара чахчы да муҥура суох үөртэ. Үөрэппит оҕобутугар, оскуолабыт баар-суох киэн туттар выпускнигар Иннокентий Семеновичка ийэлии истиҥ махталбыт муҥура суох.

Оттон бэйэбит үөрэппит оҕолорбут, тапталлаах иккис дьиэ оҥостубут оскуолабыт кэлэктиибэ чахчы да ис сүрэхтэриттэн тэрийбит биэчэрдэрэ үйэбит тухары умнуллубат өйдөбүл буолан, дууһабытын сып-сылааһынан угуттуу сылдьыаҕа. Оҕо саас сып-сылаас уйатыгар – тапталлаах Томторбут оскуолатыгар олохпутун анаабыт, кырдьык да дьоллоох дьон эбиппит, кырдьык да үчүгэй дьону үөрэтэн-иитэн таһаарбыт эбиппит диэн барҕа махтал тылларын аныыбыт. Кэлэктииппит сыаналаах бэлэхтэрэ, үөрэх салаатын, кэллиэгэлэрбит Махтал суруктара, дириэктэрбит Алена Егорова күндү анал бэлэхтэрэ, киһи дууһатын кылын таарыйар, сүрэҕин ортотунан киирэр дириҥ ис хоһоонноох эҕэрдэ альбом, этиллибит саамай сылаас тыллар, истиҥ сыһыан, учууталга таптал сырдык дьаралыга – бу барыта Елизавета Прокопьевна биһикки, дьиэбитигэр да олордохпутуна, сылааһынан өрүү угуттуу сылдьыаҕа. Учууталларгытын сыаналаан, бу маннык умнуллубаттык бочуоттаах сынньалаҥҥа атаарбыккытыгар барҕа махтал буоллун, күндү оҕолорбутугар!

Бу маннык уустук киһи киһиэхэ үтүө сыһыана олус күндү кэмигэр улуус баһылыга Иннокентий Сивцев уонна Томтор орто оскуолатын кэлэктиибэ көмүскэ тэҥнээх ытыктанар, улуус сайдыытыгар сүҥкэн кылааттаах убаастанар дьоммутугар ураты сыһыаннара киһини долгутар, кэрэҕэ, сырдыкка, үйэлээххэ угуйар. Олох күндү өрүтүн биир чаҕылхай көстүүтэ бу буоллаҕа!

Елена ПОТОЦКАЯ.

0
0