Быйыл Улуу Кыайыы 75 cылыгар уонна Ийэ дойдуга бэриниилээх буолуу сылыгар тыыл бэтэрээннэрэ дьоһуннаах үбүлүөйдэрин бэлиэтииллэрэ — икки бүк үөрүүлээх суол.
edersaas.ru
Ол курдук, бүгүн Тымныы полюһа Өймөкөөн улууһун ытык кырдьаҕаһа, Биэрэк Үрдүн төрүт олохтооҕо, тыыл бэтэрээнэ Гаврил Семенович Аммосов 90 сааһын туолар үбүлүөйдээх күнэ.
Ытык киһи Гаврил Аммосов олоҕун суола ыччаттарыгар холобурунан буолар. Кини эдэр сааһыгар 50-c сылларга аармыйаҕа сулууспалыыр кэмигэр Чуумпу акыйааҥҥа сахалартан соҕотоҕун быыһыыр хараабылга сулууспалаабыт.
Үтүөкэннээх кырдьаҕас ахтарынан, Америка Холбоһуктаах Штаттара сэрии кэмигэр Сэбиэскэй Сойууска бэлэхтээбит ураты хараабыллара эбит. Мотуруос Гаврил Аммосов 4 сыл муораҕа сулууспалаан баран, дойдутугар төннөн кэлэн, аармыйаҕа барыан иннинэ үөрэнэн ылбыт идэтинэн холкуоһугар буҕаалтырдыы сырыттаҕына, «сопхуос отделениетыгар суоппар наада буолла» диэн суоппардар куурустарыгар үөрэттэрэ ыыппыттар. Ол кэнниттэн үөрэнэн кэлээт, кини фанера кабиналаах ЗИС-5 массыынаттан саҕалаан, аныгы массыыналар уруулларын эрийэн, «Өймөкөөн» сопхуоска суоппарынан үлэлээн, төрөөбүт улууһун сайдыытыгар олоҕун 40-тан тахса сылын анаабыта. Гаврил Семенович «Өймөкөөн» сопхуоһа дорҕоонноохтук аатырарыгар сүҥкэн кылааттаах киһинэн буолар. «Мин үлэбинэн, Өймөкөөҥҥө араас мааркалаах массыына олоххо киириитин кэрэһилиир устуоруйа кинигэтин да суруйуохха сөп», — диэн ытык кырдьаҕас санаатын сиэннэригэр тиэрдэр. Гаврил Семенович кэргэнэ Надежда Григорьевна олохтон барбытын кэннэ, алта оҕотун бэйэтэ соҕотоҕун атахтарыгар туруорбута.
Билигин оҕолоро учуутал, эмчит, иитээччи, суоппар идэтин баһылаан, бэйэлэрин ситиһиилэринэн аҕаларын үөрдэллэр. Аны, сиэннэр араас ситиһиилэрин туһунан сонун эһээлэрин үөрдэн ыраах Екатеринбургтан, Нерюнгриттэн тиийэ кэлэр.
Гаврил Семеновиһы бүгүн улуус дьаһалтатын баһылыга Иннокентий Сивцев социальнай ситимнэринэн эҕэрдэлээтэ. Кини Өймөкөөн улууһун 100 сылын бэлиэтиир үбүлүөйдээх сылынан эҕэрдэлээн туран, улуус социальнай-экэнэмиичэскэй сайдыытыгар дьоһуннаах кылаатын киллэрбит тыыл бэтэрээнигэр Гаврил Аммосовка улуус олохтоохторо ис дууһаларыттан махтаналларын тиэртэ.
Өймөкөөн улууһун ытык олохтооҕо Гаврил Семенович Аммосовы үбүлүөйдээх 90 сааһынан эҕэрдэлээн туран, дьоллоох буол, ыалдьыма, чугас дьонуҥ тапталларыгар угуттанан, уһуннук олор диэн баҕа санаабытын тиэрдэбит!
Елена ПОТОЦКАЯ, «Саха сирэ» хаһыат, edersaas.ru