Тымныы полюһун уопсастыбанньыктара «Кыһыл гвоздика» аахсыйаҕа кытыннылар
Быйыл Арассыыйатааҕы «Көлүөнэлэр өйдөбүнньүктэрэ» аһымал пуонда дойду үрдүнэн сэттис сылын «Кыһыл гвоздика» значоктары тарҕатар аһымал аахсыйаны тэрийэн ыытар.
Бу значогу ылбыт дьон, ким төһө кыахтааҕынан, анал хоруопкаҕа сирэй харчынан эбэтэр хаартанан харчы угар. Киирбит харчы Арассыыйа бэтэрээннэригэр доруобуйаларын бөҕөргөтүннэрэллэригэр барар. Көмө харчынан кинилэр эмп-томп, инбэлиит кэлээскэтин, истэр тэрили, протезтары уо.д.а олус наадалааҕы атыылаһыахтарын сөп.
Өймөкөөн улууһуттан төрүттээх Дьокуускай куоракка олорор «Өймөкөөн» кэмиэрчэскэйэ суох тэрилтэ барабылыанньата өрөспүүбүлүкэ уопсастыбаннай тэрилтэлэрин истэригэр олус көхтөөтүк үлэлииринэн биллэ чорбойор. Ол курдук, быйыл күһүн өрөспүүбүлүкэтээҕи перинатальнай кииҥҥэ болдьохторун иннинэ итэҕэс төрөөбүт оҕолору өйүүр, тулалыыр айылҕаны харыстааһыҥҥа анаммыт аахсыйалар тэрийээччилэригэр улахан өйөбүлү оҥорбуттара.
Аны бу бырабылыанньа «Кыһыл гвоздика» аһымал аахсыйаҕа кыттыһан, көхтөөх үлэни тэрийэ сылдьар. Ол курдук, Тамара Винокурова, Фаина Румянцева, Ньургун Кривошапкин уонна Валентина Прокопьева биир дойдулаахтар түмсүүлэрин уонна устуодьуоннар истэригэр «Кыһыл гвоздиканы» тарҕатан, харчы хомуйбуттара. Уопсастыбаннай тэрилтэ салайааччыта Рустам Кривошапкин уоппускатын кэмигэр төрөөбүт нэһилиэгэр Өймөкөөҥҥө бара сылдьан, значоктары илдьэн тарҕатан, биир дойдулаахтарыттан харчы хомуйан аҕалла.
Бу күннэргэ бырабылыанньа аатыттан Рустам Кривошапкин уонна Фаина Румянцева сирэй харчы угуллубут анал хоруопкатын Ю.А.Гагарин аатынан Култуура уонна аныгы ускуустуба киинин иһинэн үлэлиир СӨ «Дууһабытынан эдэрбит» үрүҥ көмүс волонтердар эрэгийиэннээҕи кииннэрин салайааччыта Изабелла Павловаҕа аҕалан туттардылар.
«Кыһыл гвоздика» аахсыйа чэрчитинэн хомуллар «100», «500», «1000» солкуобайдаах харчы тус-туспа суруллан, анал боротокуолга толоруллан туттарыллар эбит.
— Бүтүн Арассыыйатааҕы аһымал аахсыйаҕа улууспут аатыттан кыттыыны ыллыбыт. Тэрээһин соруга — тыыл уонна эйэлээх кэмҥэ байыаннай дьайыыларга кыттыбыт бэтэрээннэргэ көмө, өйөбүл. Саха сириттэн 54 бэтэрээн «Көлүөнэ өйдөбүнньүгэ» пуондаҕа киирбит харчыттан бэйэлэрин доруобуйаларын бөҕөргөтөллөрүгэр көмө ылбыттар. Онон бу суолталаах аахсыйаҕа кыттыбыт дьон бэтэрээннэргэ улахан өйөбүлү оҥордулар. Дьон сирэй харчынан уонна «куар» кодунан хаарталарынан харчы уктулар.
Өймөкөөн нэһилиэгиттэн кэлбит дьааһыкка киирбит 3500-тэн тахса солк. харчыны өрөспүүбүлүкэтээҕи үрүҥ көмүс волонтердар кииннэригэр туттардыбыт. Тыа сиригэр сирэй харчы суоҕун кэриэтэ эбит. Дьон «Сбербаан» хаартатынан хото туһана олорор буолан, үксүн хаартанан көмө оҥордулар. Бу аһымал аахсыйа суолтатын өйдөөн, бэйэлэрин тус кылааттарын киллэрбит биир дойдулаахтарбар, Өймөкөөн нэһилиэгин олохтоохторугар, бырабылыанньа аатыттан махтал истиҥин тиэрдэбин, — диэн Рустам Кривошапкин санаатын үллэһиннэ.
Ю.А.Гагарин аатынан Култуура уонна аныгы ускуустуба киинин иһинэн үлэлиир СӨ «Дууһабытынан эдэрбит» үрүҥ көмүс волонтердар эрэгийиэннээҕи кииннэрин салайааччыта Изабелла Павлова «Кыһыл гвоздика» аахсыйаҕа Саха сирин олохтоохторо кыттыыларын туһунан маннык санаатын үллэһиннэ:
— Арассыыйатааҕы улахан тэрээһиҥҥэ бастакытын кыттабыт. Ол эрээри улуус аайы дьон олус эппиэтинэстээхтик сыһыаннаһан, биһиги бэрт ситиһиилээхтик кыттыбыппытын бэлиэтиир тоҕоостоох.
Ол курдук, пуонда үлэһиттэрэ бастаан ыыппыт 1100 значоктарын бэрт түргэнник тарҕаппыппыт. Ол иһин Москваҕа баар аһымал аахсыйа пуондата эбии өссө 2500 хоруопканы тарҕатарга көрдөспүтэ. Бэс ыйын 22 күнүгэр — Кутурҕан күнүгэр «Кыһыл гвоздика» аахсыйа түмүктэниэхтээх.
Өрөспүүбүлүкэтээҕи «Эйгэ» уопсастыбаннай түмсүү иһинэн үлэлиир 10-тан тахса тэрилтэ олус көхтөөх кыттыыны ылбытын бэлиэтиибит. Ордук көхтөөх үлэлээҕинэн «Өймөкөөн» кэмиэрчэскэйэ суох тэрилтэ барабылыанньата биллэр.
Улуустарга баар атын да уопсастыбанньыктар тэрээһиннээх үлэни ыыта сылдьаллар. Төһө харчы киирбитин бакаа этэр кыахпыт суох. Манна, куоракка, биир күн ыыппыт аахсыйабытыгар 10000-тан тахса солкуобай киирбитэ. Улуустартан кэлбит харчы хомуйбут хоруопкаларын бэс ыйын 22 күнүгэр астахпытына, уопсай суумаҕа таһааран, Саха сирин үрдүнэн төһө харчы киирбитэ дьэҥкэтик биллиэҕэ.
Дойду үрүҥ көмүс волонтердара 2021 сыллаахха «Кыһыл гвоздика» аахсыйа чэрчитинэн 2355837 солкуобайы хомуйбуттар. Онно 33 уопсастыбаннай киинтэн 2000-тан тахса үрүҥ көмүс волонтер кыттыыны ылбыт.
Елена ПОТОЦКАЯ, «Саха сирэ» хаһыат.
Хаартыска уонна видео — ааптар түһэриитэ уонна устуута.