Бу күннэргэ СӨ Урбаан уонна туризм министиэристибэтин оробуочай бөлөҕө Тымныы полюһугар Өймөкөөн улууһугар туризм кэскиллээх боппуруостарын үөрэтэ айанныаҕа.
Бу үлэ бэс ыйын 23 күнүгэр СӨ Урбаан уонна туризм миниистирэ Тимур Ханды ыыппыт мунньаҕын түмүгүнэн ыытыллар. Олоҥхо Ыһыаҕар бэлэмнэнии үлэ чэрчитинэн улуус баһылыга Иннокентий Сивцев бу суолталаах мунньаҕы ыытарга көҕүлээбитэ. Мунньах боротокуолугар кэккэ министиэристибэлэргэ «Өймөкөөн — Тымныы полюһа» туристическай кластеры олоххо киллэриигэ үлэлиир эппиэттээх исписэлиистэри аныылларыгар сорудахтаммыта.
Бөлөх илин эҥээр, Томпо уонна Өймөкөөн улуустарынан сылдьан, бастыҥ холобурдары көрдүөҕэ уонна быһаарыыны эрэйэр боппуруостары ырытыаҕа. СӨ Урбааҥҥа уонна туризм сайдыытыгар министиэристибэтин оробуочай бөлөҕө улуустарынан сылдьан, эрэгийиэннэр икки ардыларынааҕы «Уһук Илин» туристическай макрорегиону сайыннарыы уонна Саха сиригэр туризм сайдыытын стратегиятын былааннаммыт тэрээһиннэрин чэрчитинэн туристическай инфраструктураны тэрийиигэ уонна сайыннарыыга туһуламмыт үлэни кытта билсиэҕэ.
Туризмы сайыннарыыга инники күөҥҥэ сылдьар Өймөкөөн улууһа 2023 сылга Олоҥхо Ыһыаҕар бэлэмнэнэрин учуоттаан, СӨ Туризм сайдыытын агенствотын уонна территориальнай маркетинг автономнай тэрилтэтин салайааччыта Дмитрий Громов сырыы түмүгүнэн улуус баһылыга Иннокентий Сивцевкэ «Өймөкөөн — Тымныы полюһа» туристическай кластеры сайыннарыыга туһуламмыт тосхоллору, сонун көрүүлэри билиһиннэриэҕэ.
Өймөкөөн улууһугар биир сытыы боппуруоһунан ыраах айаннанньыттар тохтоон, көлөлөрүн көрүнэр, сапыраапкаланар, үссэнэн ааһар Күбүмэ тохтобулун сайыннарыы буолар. Бу Өймөкөөҥҥө улахан аартыгы арыйарын быһыытынан, улуус баһылыга Иннокентий Сивцев баһылыгынан туруоҕуттан туруорсан кэлбит бастакы боппуруоһунан буолар.
Бу ыытыллыбыт үлэ түмүгүнэн СӨ экологияҕа миниистирэ Евгений Перфильев Ойуур хаһаайыстыбатын департаменыттан Күбүмэ сирин учаастагын урбаанньыттарга арыандаҕа биэриигэ үлэлэһэр исписэлииһи аныаҕа.
Оччотугар Олоҥхо Ыһыаҕар ыалдьыттары көрсөр Күбүмэҕэ баар суол сервиһин оҥорор учаастак хаһаайыннанан, тупсар аатыгар барара чахчы
Елена ПОТОЦКАЯ, «Саха сирэ» хаһыат.
Хаартыска — Иннокентий Сивцев тиксэриитэ уонна «БэЗэ-trip, Оксана Никитина» саайтан.