Сарсыҥҥыттан, атырдьах ыйын 1 күнүттэн, Тымныы полюһун Өймөкөөн улууһун Төрүт нэһилиэгэр Бүтүн Сойуустааҕы биэрэпис ыытыллар.
Суолталаах тэрээһиҥҥэ 346 киһи хабыллыаҕа. Улуус уоннааҕы нэһилиэнньэлээх пуунугар биэрэпис уопсай болдьоҕунан алтынньыга ыытыллыаҕа.
Тоҕо чуолаан Төрүт нэһилиэгэр эрэ биэрэпис эрдэ ыытыллар буолла? Нэһилиэккэ төһө да улуус кииниттэн «Халыма» федеральнай суолунан икки эрэ чаас айаннаан тиийэр буоллахха, салгыы туораан Силирикээн сиһинэн айанныыр суолунан өссө хас да чаас айаннаан тиийэр эрэйдээх суоллаах буолан, биэрэпис эрдэ ыытыллар буолла. Алтынньыга өрүс тоҥор кэмэ буолан, сырыы эмиэ атахтанар. Онон улуус киинин «өҥөйө» сытар нэһилиэк суола-ииһэ мөлтөҕүттэн кытыы сиринэн ааҕыллар. Бу күннэргэ курулас ардах түһэн, хайа хаара ууллан, улахан сүүрүктээх уу Көһөр үрэҕинэн ааһар суол өйөх турбатын имири сотон ааста. Онон сырыы эмиэ харгыстанна.
Ол да буоллар, кыра нэһилиэк биэрэпис ыытарга толору бэлэм: улуус дьаһалтата тустаах докумуонунан биэрэписчити хааччыйда. Атырдьах ыйын 4 күнүгэр нэһилиэнньэни кытта үлэ саҕаланыаҕа.
Елена ПОТОЦКАЯ, “Саха сирэ” хаһыат, edersaas.ru