Уопсастыба

Тымныы полюһун Төрүтүгэр — «Өйдөбүнньүк чүмэчи» аахсыйа

Өймөкөөн улууһун Төрүт нэһилиэгэ бу күннэргэ ыытар тэрээһиннэрэ Саха сирэ Арассыыйа састаабыгар киирбитэ 390, Саха АССР төрүттэммитэ 100,  улууска биллэриллибит Өймөкөөн оройуонун 1-кы гильдиялаах меценат-атыыһыта Н.О. Кривошапкин төрөөбүтэ 185 сылыгар биллэриллибит Үтүө дьыала сылларыгар ананар.

Ол курдук, Саха АССР төрүттэммитэ 100 сылыгар Төрүт орто оскуолатын үөрэнээччилэрэ учууталларын кытта Пионер хайатын чыпчаалыгар тахсан, сэбиэскэй кэм ыччаттара туруорбут сэргэлэригэр сүгүрүйбүттэрэ.

Төрөөбүт дойдуларын аһын-үөлүн быыстапкатын тэрийбиттэрэ.

Г.А.Кривошапкин аатынан орто оскуола оҕолоро төрөппүттэрин уонна учууталларын кытта Өрөспүүбүлүкэ күнүгэр сэлэлээн хаампыттара.

Саха сиригэр олороллорун киэн туттан туран үөрэн-көтөн айхаллаабыттара, туойбуттара.

Тыйыс тымныылаах Тымныы полюһун олохтоохторо буолалларын көрдөрбүттэрэ.

Кыра нэһилиэк олохтоохторо биир эйэлээх дьиэ кэргэн буолалларын  бигэргэппиттэрэ.

Бырааһынньык киэһэ олохтоохтор көлүөнэлэринэн спортивнай күрэхтэһиини тэрийбиттэрэ.

Ньукулай Кырбаһааҥкын 185 сылыгар анаммыт улуустааҕы аахсыйаҕа кыттыһан, аһымал кэнсиэр көрдөрбүттэрэ. Олохтоох амбулатория эмчиттэрэ Төрүккэ олорор араас омук дьонун сыдьааннарыгар анаан бэйэлэрин үҥкүүлэрин анаабыттара.

Салгыы Саха АССР 100 сылыгар анаан  тэрилтэлэринэн көмөлөөн астаабыт бырааһынньыктааҕы минньигэс тортарынан кэлбит дьону барыларын күндүлээбиттэрэ.

Бэҕэһээ, ыам ыйын 7 күнүгэр, нэһилиэк олохтоохторо «Өйдөбүнньүк чүмэчитин» уматан, Аҕа дойду Улуу сэриитигэр олохторун толук уурбут дьону кэриэстээтилэр.

Тыыл бэтэрээннэрэ сиэннэрин кытта кэлэн, кутурҕан миитинигэр кыттыыны ыллылар.

Оскуола оҕолоро хос эһэлэрин, эбэлэрин мэтириэттэрин илдьэ кэлбиттэр.

Төһө да  тымныы күн буолбутун иһин, нэһилиэк дьоно суолталаах тэрээһиҥҥэ көхтөөхтүк кытыннылар.

Манна Аҕа дойду Улуу сэриитин кыттыылаахтарыгар уонна тыыл бэтэрээннэригэр анал стела оҥоһуллубута.

Истиэндэҕэ көмүс буукубанан суруллубут ытык кырдьаҕастар үөлэннээхтэрэ, оҕолоро, сиэннэрэ, хос сиэннэрэ өйдөбүнньүк чүмэчилэри ууран,  дойду бары эрэгийиэннэригэр, куораттарыгар ыытыллыбыт тэрээһиннэргэ биир санаанан кыттыстылар.

 

Елена ПОТОЦКАЯ, «Саха сирэ» хаһыат, edersaas.ru

 

 

1
0
Telegram @edersaas20