Бу күннэргэ Өймөкөөн улууһун спортсменнара Горнай улууһугар ыытыллар Манчаары оонньууларыгар кыттаары бэлэмнэнэллэр.
Улуустааҕы дьаһалта физическэй култуураҕа уонна спортка исписэлииһэ Сергей Егоров иһитиннэрбитинэн, Тымныы полюһуттан 40 спортсмен: 22 улахан киһи, 18 оҕо кыттар. Кинилэр күрэхтэһии бары көрүҥнэригэр эрчиллэллэр. Ол курдук, охчуттар хамаандалара (тренер Игорь Хоменко аатынан Уус Ньаратааҕы орто оскуола физкультураҕа учуутала Тимур Ядреев) Дьокуускайга бастыҥнары талар күрэхтэһиигэ кытынна. Бу күннэргэ Томтор уонна Өймөкөөн нэһилиэктэригэр спортсменнар кэккэ көрүҥнэргэ эрчиллэллэр. Ол курдук, юниордар хотугу многоборьеҕа, хапсаҕайга, сүүрүүгэ, ыстаҥаҕа
күрэхтэстилэр. Томторго ыччаттары тустууга ыстаарсай тренер Владимир Саввинов дьарыктыыр.
Өймөкөөн улууһун чиэһин хамаандаҕа киирсэн, Тымныы полюһуттан төрүттээх аатттаах-суоллаах спортсменнар көмүскүөхтэрэ. Кинилэр ортолоругар Төрүт нэһилиэгиттэн төрүттээх, краповой берет хаһаайына, өрөспүүбүлүкэ көҥүл тустууга ааттаах- суоллаах спортсмена Рустам Машарипов баар. Бу күннэргэ кини Осетияҕа эрчиллэр.
— Өймөкөөн улууһун спортсменнарын улуус баһылыга Иннокентий Сивцев битэмииннээх спортивнай аһынан-үөлүнэн хааччыйда. Онон улууспут аҕа баһылыгар Манчаары оонньууларыгар кыттаары сылдьар спортсменнар барҕа махталларын тиэрдэллэр, — диэн бэлиэтээтэ Сергей Егоров.
Манчаары оонньууларыгар Өймөкөөн бары нэһилиэктэриттэн кыттыыны ылыахтара. Онон улуус хас биирдии нэһилиэгин дьоно-сэргэтэ бэйэлэрин ыччаттарыгар кыайыы көтөллөнөн кэлэллэригэр баҕа санааларын этэн атаарыахтара.
Елена ПОТОЦКАЯ,
«Саха сирэ» хаһыат, edersaas.ru