Маны аах Эдэр саас

Тымныы полюһун оҕолорун Францияҕа ыҥырдылар

Бу күннэргэ Өймөкөөҥҥө Социалистическай Үлэ Дьоруойа Г.А.Кривошапкин аатынан Төрүт орто оскуолатын икки үөрэнээччитин учууталларын кытта Францияҕа ыҥырдылар.

Ыраах Францияҕа ыҥырыыны  хайдах туппуттарын туһунан орто оскуола алын сүһүөҕүн кылааһын учуутала Светлана Босикова бу курдук кэпсиир:

«Биһиги оскуолабыт биир уратыта — оҕолорбутун тэйиччиттэн араас таһымнаах айар куонкурустарга (улууска, өрөспүүбүлүкэҕэ, Арассыыйаҕа тиийэ) өрүү кытыннарабыт. Ол курдук, үөрүйэхпитинэн быйыл Москва куоракка «Сократ» үөрэх сайдыытын института ыыппыт «Доҕоргор сөптөөх суолу таларыгар көмөлөс» диэн куонкуруска кылааһым оҕолорун үлэлэрин, уруһуйдарын ыыппытым. Онтон Кеша Свинобоев уонна Кеша Босиков үлэлэрин тэрийээччилэр «Евромедиа» быыстапкатыгар ыыттыбыт» диэн иһитиннэрбиттэрэ. Арай, ыам ыйыгар, Парижтан кыраамата уонна сэртипикээт кэлэн соһутта! Кеша Босиковка 1 истиэпэннээх диплому, Кеша Свинобоевка куонкуруска кыттыбытын туһунан Туоһу сурук ыыппыттар. Уонна эбии «Наҕараадаларгытын Парижка ыла кэлиҥ» диэн ыҥырыы сурук туттубут. Хомойуох иһин, коронавирус сыстыганнаах дьаҥа хаарыан ыҥырыыга аккаастыырга күһэйдэ. Пандемия суоҕа буоллар, хайаан да барыахпыт этэ«.


Салгыы Светлана Иннокентьевна эмиэ бэртээхэй сонуну кэпсээтэ:
» Оскуолабар өр сылларга методическай түмсүү салайааччытынан үлэлээн кэллим. Наһаа көхтөөх, олох үөһүгэр сылдьар кэллиэгэлэрдээхпинэн киэн туттабын. Ол курдук, Анна Павлуцкая «Тымныы полюһа ыччаты түмэр» научнай практическай кэмпириэнсийэҕэ үөрэтэр оҕотун кытыннаран, быйыл атырдьах ыйыгар Болгарияҕа ыҥырыы тутан, онно барарга бэлэмнэнэр. Оттон Варвара Дьяконова салайар «Лучики» диэн ырыа бөлөҕө араас курэстэргэ кыттан, кыайыылаахтар ааттарын ылан, «Өлүөнэ очуостара» Айылҕа пааркатыгар күүлэйдииргэ ыҥырыы туппуттара. Оттон кини НПК-ҕа бэлэмнээбит үөрэнээччитэ Радомир Берёзкин Турцияҕа ыҥырыылаах. Елена Слепцова эмиэ НПК-ҕа бэлэмнээбит үөрэнээччитэ Диана Беляева учуутал бэйэтэ айбыт олоҥхотугар мультипликационнай киинэ оҥорон, Москваҕа тиийэ ыҥырыллан, ситиһиилээхтик кыттан кэлбитэ«.
Ити курдук, Тымныы полюһун кырачааннара киин сиртэн төһө да ыраах олордоллор, учууталларын өйөбүлүнэн тэйиччиттэн араас куонкурустарга кыттан миэстэлэһэллэр. Коронавирус сыстыганнаах дьаҥа мэһэйдээбэтэтэҕэ буоллар, бу күннэргэ үлэлэрин түмүгүнэн ыраах  баран дуоһуйа көрөн, сынньанан кэлиэхтэр этэ.

Елена ПОТОЦКАЯ, «Саха сирэ» хаһыат, edersaas.ru

1
0