Тымныы полюһуттан Өймөкөөнтөн лиидэр кыргыттар пуорумнарыгар кытта кэлбит Ульяна Захарова төрөөбүт дойдутугар уопсастыбаннай олоҕу көҕүлүттэн туппут киһи.
edersaas.ru
Кини үс оҕо күндү ийэтэ, тапталлаах кэргэн, соҕотох аҕа ииппит улахан кыыһа. Ульяна Захарова тыа сирин кулуубун дириэктэрэ буолан, хас биирдии тэрээһин кинитэ суох барбат. Билигин төһө да оҕотугар олордор, куоракка кэлэ сылдьар кэмигэр буола турар пуорумҥа анаан кэлбит.
«Түөрт былаһаакканан сылдьан, дьиэ кэргэн, бэйэ дьыалатын тэринии, доруобуйа, бэйэ сэбэрэтин көрүнүү туһунан истээри кэллим. Тэрээһин интэриэһинэй буолара пленарнай мунньахтан да көһүннэ.
Урбаан миниистирэ Ирина Высоких, Үлэ уонна социальнай харысхал миниистирэ Елена Волкова, куорат Дууматын дьокутааттара, биллэр урбаанньыт дьахталлар бэрт интэриэһинэй иһитиннэрии диэри оҥордулар. Оттон олус наадалаах хайысхалаах былаһааккаларга санаа атастаһыылара өссө болҕомтону тардыахтара», — диэн Ульяна санаатын үллэһиннэ.
Онон Лиидэр кыргыттар пуорумнара сандал сааһы көрсө көхтөөх эдэр ийэлэри түмэрэ, сонун хайысхалары, бырайыактары торумнуурга көҕүлүүрэ хайҕаллаах дьыала.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа уонна видеоҕа ааптар түһэриитэ уонна устуута