Урукку сылларга Өймөкөөн улууһугар ыытыллар кыһыҥҥы туризм бэстибээлигэр олохтоохторго ордук болҕомто ууруллан, араас ис хоһоонноох тэрээһиннэр буолаллара.
Киин куораттан ааттаах-суоллаах артыыстары ыҥыран кытыннараллара, уопуттаах режиссердар бэстибээл аһыллыытын тэрийэллэрэ. Быйыл 20 сыллаах үбүлүөйдээх тэрээһин олох уратытык ыытылынна. Тэрээһин сүрүннээн туристарга анаан тэрилиннэ. Ол да иһин быйыл хаһааҥҥытааҕар да элбэх турист Саха сирин улуустарыттан уонна Арассыыйа араас эригийиэннэриттэн кыттыыны ыллылар. Санаан да көрдөххө, 200-чэкэ турист биир дьоҕус нэһилиэккэ кэлэн түһэрин, үс күнү быһа олохтоохтук сынньанан барарын холкутук, ыксала суох тэрийии — Өймөкөөн улууһун олохтоохторо туризм эйгэтигэр 20 сыллаах үлэлэрин түмүгэ, дьэ, бу.
Бастакы сыллар курдук, дьиэ-уот, ас-үөл, хонук сир тиийбэт кыһалҕата диэн суох. Олохтоох дьаһалта үлэһиттэрэ тустаах үлэлэрин дьаһалтаҕа хоно сытан оҥордулар, туристары тэрээһиннээхтик көрүстүлэр. Бу эмиэ тэрээһинтэн улахан тутулуктаах эбээт. Хас турист хаһан, хантан кэлэрэ-барыта суот-учуот. Туристары аан дойдуга аатырар Өймөкөөҥҥө илдьэн саха ынаҕын уонна Өймөкөөн сылгытын боруодатын хайдах иитэллэрин көрдөрдүлэр.
Онон быйылгы кыһыҥҥы туризм бэстибээлэ туристарга эрэ туһаайыллыбыт буолан, уратытык ыытылынна.
Елена ПОТОЦКАЯ, «Саха сирэ» хаһыат, edersaas.ru